Atualità
Internet aslöm Picolin-La Ila: i laûrs scomëncia
Cun la fin dla sajun da d’isté va inant i laûrs por l’internet aslöm tla Val Badia. Chisc dis metaràn man da mëte jö i rôs danter Picolin y La Ila. “I laûrs reverda i rôs ćina a La Ila, daldô gnaràl atira trat tres les fires otiches”, à dit l’assessur Florian Mussner.
I laûrs por mëte jö i coliamënć de internet aslöm da Picolin a La Ila reverda feter 10 chilometri. "Ajache al é bele gnü metü sön val' tòć i rôs, tómel demez feter dui chilometri che é bele a post" spliga l'ing. Marco Springhetti, responsabl tecnich dla Provinzia. Ajache la Junta provinziala s'à tut dant da arjunje ćina ala fin dl ann vigni comun dl Sudtirol cun les fires otiches, jaràn tla Val Badia atira inant cun le proscimo vare. "La preparaziun tecnica é tan co stlüta jö y a chësta manira podaràn d'altonn atira trà tres i cabli de fira otica", spliga l'assessur Florian Mussner. Canche la Provinzia sarà rovada ćina te vigni comun cun i cabli él spo la Telecom che mëss adatè i aparać tles zentrales dl telefonn. Tl raiun dailò dlungia ćina a n valgügn chilometri podarà la jënt ciafè l'internet aslöm inće tres i vedli cabli dl telefonn. Les ćiases che é plü dalunc dales zentrales adora ćiamò val' tòch de coliamënt de fires otiches. Chësc ultimo tòch, l'ultima milia, mëss la Provinzia ti lascè fà por lege ai comuns.
I rôs danter Picolin y La Ila vëgn metüdes jö tles proscimes edemes sön i trus dles rodes, sön trottoirs y en pert inće sön strada. Por lascè fà chisc laûrs à la Provinzia inćiarié la firma Rossi Costruzioni de Vicenza, che â davagné le concurs cun na soma de 914.130 euro. Aladô dl ing. Springhetti aràton de rové chisc laûrs ćina mez novëmber.
Le colegamënt por l'internet aslöm tla Val Badia é bele arjigné da San Laurënz ćina a Al Plan de Mareo. Le tòch danter Longega y Picolin vëgn fat en colaboraziun cun l'aministraziun di bosć che é bele tl laûr da fà le tru dles rodes. La proietaziun por le tòch da Picolin a San Martin é bele rovada y inće por chësc tòch podaràn śëgn jì inant cun les prozedöres por scrì fora i laûrs.
De plü informaziuns sön la rëi de internet aslöm tl Sudtirol é da ciafè sön www.provinzia.bz.it/breitband.
as
