Atualità
Junior ranger tl Parch natural Fanes-Senes-Braies
A Al Plan de Mareo él gnü stlüt jö en domënia la formaziun da junior ranger. I pici ranger à podü pié do le diplom de junior ranger di parcs naturai dl Sudtirol dai colaboradus dl parch natural y dai rapresentanć dla Lia da Munt Ladinia Val Badia.
Impröma à i prinzipianć junior ranger scrit fora deboriada cun sües families n quiz de contlujiun por odëi ći che i pici à imparè tratan süa formaziun. Cun gran morvëia à i geniturs y i familiars podü constatè tan che sü mituns à podü imparè tres l'esperiënza tla natöra, l'aventöra, le jüch y le devertimënt. Tl quiz êl domandes desvalies sura tiers y plantes, implü êl inće jüć da sciazè y d'abilité. Cun placać fać instësc ti à i prinzipianć junior ranger mostrè a sü geniturs y a fredesc y sorus ći che ai à fat tratan süa formaziun de ot dis tratan i mëisc da d'isté. Argomënć dla formaziun ê l'orientamënt, la sciënza dles chertes, le pröm aiüt sö por munt, l'ecologia dl survival (suravire tla natöra), inseć, la flora y la fauna dles munts, l'osservaziun dla salvarjina, anfibs y retii.
Pro la festa de contlujiun ti à surandè i colaboradus dl Ofize Parcs Naturai y i rapresentanć dla Lia da Munt ai mituns y ales mitans danter 10 y 11 agn le diplom de junior ranger di parcs naturai dl Südtirol. I rapresentanć dl'aministraziun di parcs naturai y dla AVS/Lia da Munt é stà dër contënć dla colaboraziun y ô pité inant deboriada chësta formaziun inće tl dagnì. Deache düć i mituns y dötes les mitans che à tut pert fajô pert dl grup linguistich ladin él por le pröm iade inće gnü fat n valgönes unitês por ladin. Le feedback di geniturs é stè positif: por la bona organisaziun dles escurjiuns, la sensibilisaziun di mituns y dles mitans por la sconanza dla natöra y por l'aprendimënt zënza presciun de prestaziun.
La formaziun é bele dal mëteman inant gnüda metüda a jì en colaboraziun cun le AVS y en chësc ann por le pröm iade inće cun le CAI por le grup de lingaz talian y la Lia da Munt por chël ladin. Dal scomenciamënt dl proiet dl 2009 él gnü insigné jö indöt 14 grups, 210 mituns y mitans, che à podü se gode la formaziun de basa de 8 dis por deventè junior ranger. Inće do la formaziun de basa vëgnel ćiarè de chisc mituns y de chëstes mitans; al vëgn preodü cin aziuns suandëntes ti dui agn do la surandada dl diplom: ativitês por le grup dassù, ativitês che tol ite düć i grups y ćinamai n'ativité che tol ite döta la familia. La formaziun da junior ranger vëgn pitada se baratan jö te düć i 7 parcs naturai: chësc ann che vëgn saràra tl Parch natural Texel y tl Parch natural Puez-Odles.
usp
Galaria dales fotografies
