Atualità

Laûr | 10.09.2013 | 15:26

Pruvedimënc contra la dejocupazion: minister Giovannini pra cunvëni a Bulsan

L medemo spirt, i medemi fins y la medema grupes de referimënt: l minister per l lëur, Enrico Giovannini à (NCUEI) ai 10 de setëmber pra n cunvëni a Bulsan sorissa tant che l program per l lëur dla Jonta provinziela ti semieia a chël dl Stat. Purempò se à i assessëures Roberto Bizzo y Sabina Kasslatter Mur damandà dal Stat plu lerch de muvimënt per vester bon de ti tenì permez ala dejocupazion.

L minister per l lëur Giovannini à paredlà l plan de pruvedimënc per plu ani nvià via dala Jonta provinziela y l pachetl dl Guivern talian a Roma. "Da tramedoi pertes iel da udëi drët tler paraleles" à dit l minister rujenan per ejëmpl dl sustëni per pratica prufesciunei, l sustëni a persones cun handicap y i pruvedimënc acioche l vënie tëut su culaburadëures nueves.

Giovannini à dat pëis che da pert dl Guviern talian se rënden bën cont che na politica per l lëur sun n tëmp plu lonch taca adum cun l dé sgors al'economia. Nce te chësc vieres à Roma nvià via pruvedimënc che ti semieia a chëi de Bulsan, sciche la ntroduzion de sistems a bonus per ressanamënc de cëses, per judé inant l ciamp dla costruzions. Nce tla politica dla chëutes vëniel laurà per smëndrì l pëis sun i mprenditëures y la reduzion dla defrënza danter paiamënc lordo y netto. L cuntrat dla generazions purtà inant dala Jonta provinziela (mez tëmp per jënt de tëmp cun duta la pension, sce l ti vën fat lerch a jëuni) à l minister Giovannini cunscidrà n bon ejëmpl de na soluzion creativa, sciche ulù dal Guviern talian.

Bele danora ova l assessëur Roberto Bizzo prejentà l program de plu ani per de plu stieres. La fundamënta de chësc program ie che dal 208 iel unì metù a jì 4000 stieres tl Sudtirol, ma davia che for plu persones ie despostes a lauré (dantaprima l'ëiles) ie la cuota dla dejocupazion mpomo jita suvier. Bizzo à sorissà che l mancia n balanz danter la stieres pitedes y la dumanda sun l marcià de lëur: "L vën damandà jëuni cun de bona cualifiches y che sebe de plu rujenedes" à dit l assessëur. Ma iust la cunescënza de plu rujenedes ie una dla gaujes prinzipeles che jëuni dl Sudtirol ne abina nia da lëur.

L fin dl program ie chël de purté nchin dl 2020 la perzentuela dla jënt che à na stiera da 77 a 80 percënt. Chësc uel di che uni ann iel de bujën de auzé la cuota de 1,1 ponc. "Te zifres assolutes uel chësc di che nchin dl 2020 messons arjonjer 21.000 stieres nueves, y chësc ie n fin che se lascia bën arjonjer" à dit Bizzo.

L program per plu stieres vëija dant 44 pruvedimënc. Chisc ie dantaprima pensei per jëuni, per chëi sëura 55 ani, ëiles y persones dejavantajedes. I pruvedimënc ie partii te cin categuries: l adatamënt dla furmazion, stieres nueves te ciamps inuvatives, cun na gran produzion y che dura te n tëmp plu lonch. Leprò iel pruvedimënc per dé sgors al'economia (lascian do chëutes, fajan pachetli de pruvedimënc per l'economia y tulan demez burocrazia), l cumpaniamënt de grupes zënza lëur y de plu ressorses per l Ufize servisc per l lëur.

L' assessëur Sabina Kasslatter Mur à rujenà dl sistem de furmazion duala che ie una dla rejons ciuldì che la dejocupazion di jëuni ie tl Sudtirol plu bassa permez ala media statela. Purempò iel de bujën de lauré inant. La se trata de descedé plu sensibltà per la furmazion prufesciunela. "Messon ti fé capì ai jëuni che l mparé cun l cë y cun la mans ne vel nia de manco che me mparé cun l cë" à dit Kasslatter Mur.

L sistem de furmazion duala possa me jì bën nchin che l ie firmes che tol su lerneri. Na segonda dificultà ie che l vën pità de manco stieres per lerneri ajache tla Talia vëniel pertendù scialdi de plu n cont de segurëza y defendura di jëuni permez a oradecà. Kasslatter Mur se à nce damandà plu lidëza a mëter a jì l'ufierta furmativa, davia che la normes stateles ie drët stares. "Sce l Guviern nes vën ancontra y nes lascia fé, pona ti sons'a bën, pona abinons pra na mëisa cun duta la pertes nteressedes na soluzion che vede bën ai jëuni zënza lëur" nsci l'Assessëura. (USP)