Atualità
Dal 4 de nuvëmber “Trail” mo n tan' lonch
La RAI ladina scumencerà ai 4 de nuvëmber cun na segonda edizion dla nutizies tla televijon. Chësta segonda edizion de “Trail”, mo n tan longia, sarà da udëi dala diesc da sëira. Chësc ie unì cunedì (NCUEI) ai 07 de utober dal presidënt dla Provinzia Durnwalder, aldò de tant che ie chisc dis unì fata ora dala cumiscion paritetica RAI-Provinzia.
Per ngrandì l servisc de radio y televijion publica tla rujeneda tudëscia y ladina se à la Provinzia sëurantëut de paië ala RAI 20 milion de euro al ann. Da pert dla RAI ladina iel per l radio me unì fat de pitla mudazions tl orar. Tla televijion iel bel unì scumencià a mustré n segondo iede al'ena trasmiscions de aprufondimënt. Cie che mancia mo ie la pert plu aspiteda, la nutizies plu longes.
"La segonda edizion de Trail ie la pert prinzipela dl ampliamënt dla RAI Ladina y chësta dëssa muever, lunesc, ai 4 de nuvëmber" à detlarà l presidënt dla Provinzia Luis Durnwalder do la senteda dla Jonta. Per fé la segonda edizion de Trail à la RAI udù dant 9 jurnalisć, trëi per la val Badia, trëi per Gherdëina y trëi per Fascia.
La segonda majera nuvità per la RAI Ladina ie la nomina de n redadëur-chef a na maniera che nce la redazion dla nutizies ladines ebe si autonomia. Nchinamò fova dependovela daniëura dala redazion de rujeneda taliana. "L ie de bujën che meton a verda che nce la pert ladina ebe si dërc" à detlarà Durnwalder.
La RAI ie tardiva a mëter n droa la nuviteies, ajache la se à stentà a abiné jurnalisć y prugramisć de rujeneda ladina. Per valivé ora 41 ëura de televijion che ëssa bele messù unì mustreda, uniral dal 14 de utober mustrà plu trasmiscions per ladin. Chësta trasmiscions sëuraprò de televijion ladina sarà da udëi trëi iedesc al'ena nchin che n arà curì la 41 ëura. (USP)
as
