Atualità
Juebia ai 10 a Bulsan: nseniamënt for plu europeich
De furmazion y nfurmazion se traterala n juebia ai 10 de utober pra dl di dedicà ai proiec “De viac de viers dl’Europa” y “MyEuropeTeachers”. La Repartizion Europa, cun i Departimënc per la educazion dla trëi grupes de rujeneda dla provinzia y cun la cunlaurazion dla Università liedia de Bulsan nvieia duc i nteressei n juebia 10 de utober 2013, dala 9,30 ala 17,30 tl Università liedia de Bulsan.
L di de furmazion y nfurmazion scumëncia danmesdì cun studëntes y studënc che prejenterà i proiec realisei cun na scola auta de rujeneda tudëscia. L unirà purtà dant i lëures fai deberieda, l viac de furmazion pra la istituzions europeiches a Bruxelles y duta la esperienzes che toca leprò. Ntant prejenterà la Università de Bulsan la pusciblteies de studi y de practicum ora per l’Europa. Per stlù ju, unirà premià i trëi proiec plu nteressanc (cris ora diretamënter dai studënc y dal publich che unirà a ti cialé).
L domesdì unirà dedicà ala furmazion di nsenianc, n particuler unirà tratà avisa n tema storich de gran nteres: Rolf Steininger rujenerà de Europa y Ujin Urient. Daldò unirà prejentà da pert di representanc dla Agenzia Naziunela de Firënza l nuef prugram n cont de educazion, furmazion, junëza y sport: ERASMUS+. L unirà spiegà i mudamënc permez al vedl prugram y la nueva pusciblteies per la scola per i proscimi 7 ani (2014-2020). Ntëurvia, na lingia de ntervënc y esperienzes europeiches da pert di nsenianc (job-shadowing) y la pusciblteies de barat virtuel (Etwinning).
L di de furmazion y nfurmazion tl cheder dl prugram naziunel ‘Europa dell’Istruzione’ y dl proiet dla Repartizion Europa ‘De viac de viers l’Europa’ ie daviert a duc, diretëures, nsenianc, personal dla scola y duc i nteressei.
usp
