Atualità
100 dis de Jonta provinziela: l resultat ie positif - sies obietifs
Chëst'ena ie chësta Jonta provinziela da cënt dis n cëria y la lista dla dezijions che ie unides tëutes ie scialdi longia. L Presidënt dla Provinzia Arno Kompatscher l'à presenteda (ai 15 d'auril) cun si team de guviern auzan ora dantaldut la sies mires che l se ova tëut dant de arjonjer dan la vela ti prim 100 dis de si presidënza.
Danora la detlarazion dl Presidënt Kompatscher: L ie, àl dit inier pra la presentazion dl bilanz di prim 100 dis, "relativamënter cuntënt" cun cie che ie unit arjont: "Sambën me mbincëssi che fosse stat bon de de realisé dut ala perfezion, ma ie rate che l resultat posse mpò se lascé udëi, sce n pënsa a duta la dezijions de prëscia che ie unides tëutes y ala gran reurganisazion dejëuta", nsci Kompatscher. Ël à oradechël sotrissà che l ie nce unit realisà tl stil cie che n se ova tëut dant: "On for cris la streda partezipativa y chësc nia mé ala semea" à dit l Presidënt dla Provinzia. N à cialà de tenì cont dla prupostes che ie unides ora da duta la descuscions cun i reprejentanc dl'assoziazions, dla pertes sozieles y dla sozietà zevila: "Cun chël che on pudù les tò n cunscidrazion canche on tëut nosta dezijions, ieles tumedes ora plu de utl, plu balanzedes y plu tleres", nsci Kompatscher.
Per cie che reverda l program di sies obietifs ie l prim pont cumpedà su iló la reduzion di cosć dla politica. La Jonta provinziela à tratà chësc pont da de plu ponc d'ududa, sciche per ejëmpl tres na reduzion di auti de servisc o metan adum la funzions dl Vizepresidënt dl Cunsëi regiunel y dl Cunsëi provinziel y smesan la spëises de reprejentazion (y si abolizion per l Presidënt y l Vizepresidënt dla Region). "On pudù arbassé nsci la spëises de reprejentazion dla Region da 90.000 a 15.000 euro, tl capitul dla Presidënza dla Jonta provinziela resulteiel śën mé plu 1,8 mpede 4 milions d'euro", nsci l Presidënt dla Provinzia.
Nce a livel istituzionel - l segondo obietif tl program - à la Jonta provinziela bele metù azënc te si prim 100 dis de ncëria. Nsci iesen unic a una de limité la ncëria dl Presidënt dla Provinzia a trëi legislatures (y nce chëla di cunselieres aministratifs y de verdia di ënc provinziei) y de crië per ejëmpl cumpetënzes per la scemplificazion dla pruzedures y per la reforma dl'aministrazion. De gran vares inant àn nce fat n cont dl cuntrol buracratich, a chël che uni lege provinziela ududa danora dëssa unì sometuda, y n cont dl'istituzion de na Aduneda per l'autonomia che dëssa nvië via y njinië la reforma dl Statut d'autonomia. Mé la grupa de lëur per la reforma dl'aministrazion, che dassova pië via ti prim 100 dis, ne à mo nia fat de gran vares. Alincontra, àn metù man cun la reforma dl'IPES, per chëla che l ie bele unì tëut la prima mesures.
Na pert zentrela dl lëur ti prim 100 dis fova la politica economica. Tlo vala dantaldut de alesiré l pëis che safoia i zitadins y l'aziendes. Daviadechël àn arbassà la cëria dla chëuta regiunela sun l'ativiteies produtives IRAP sciche chëla dla chëuta sun l davani dla persones fisiches IRPEF (tres la ntruduzion de na No-Tax-Area). Tla medema direzion va la regulamentazion dla chëuta cumenela sun i bëns mubii IMI, che la Jonta provinziela ova bele purtà inant delà da si program di 100 dis y presentà tl Cunsëi provinziel, ulache l dessëni de lege unirà mo tratà chëst'ena. Cunedì tl program di 100 dis fova alincontra l dessëni de lege cun chël che l dëssa unì regulamentà la cunzescions per la gran derivazions d'eghes. A chësc fin à la grupa d'esperc y espertes tl raion dl'energia laurà ora na pruposta che la Jonta provinziela à ejaminà propi te si senteda da inier (cëla comunicat aposta). Oradechël vëniel nce laurà sun na lege provinziela per i apalc che respeteie la linies diretives dla EU: "Pervia che nosta lege sarà la prima a livel europeich che cuntenirà criteres sciche chëi per la dureda de n prodot o nce l parameter dl kilometer nul nes à la UE bele segurà si sustëni", nsci Kompatscher.
Cunedides coche mesures de politica de familia y soziela - obietif cater tl program - fova l sustëni di pensionisć plu stentei coche nce l tò su dla tratatives cun la pertes sozieles per l miuramënt dla defendura dla maternità tl'aziendes privates. Iust tl ciamp dla pensions basses ne uelen nia plu les auzé, coche l fova n iede pensà: "L se purtëssa pro l pericul che l stat straichëssa si paiamënc de njonta y i pensionisć restëssa ala fin cun i medemi scioldi te fuia", nsci l Presidënt dla Provinzia. Mpede chësc ti fajëssen ai pensionisć n paiamënt anuel unich che i judëssa a paië i cosć dla vita da uni dì. "Nosc travert ie che i pruvedimënc ebe a uni moda bele fazion chëst ann" à Kompatscher detlarà. Cie che reverda la defendura dla maternità ne ulëssen nia dé speranzes che n ne possa pona nia mantenì: Tlo vala de na regulamentazion che dëssa ti dé la puscibltà ala umans che lëura tla firmes privates de mëter permò inò man plu tert cun l lëur do avëi giapà n pop: "Cie che ulessan ie na garanzia de lëur plu longia che ne cumpurtëssa nia de majera spëises per l'aziendes ", nsci l Presidënt dla Provinzia.
A tëmp mesan resta l obietif plu mpurtant dla Jonta provinziela l'elaburazion nueva y dl bilanz dla Provinzia. A chësc fin dëssa la grupa de lëur nunzieda tl program di sies ponc coche obietif numer cinch lauré ora la fundamëntes. "Cun la lege finanziera ie chësta grupa de lëur unida crieda, śën vala de numiné si cin' cumëmbri.", à dit Kompatscher. Trëi de chisc cumëmbri vën numinei dal Cunsëi provinziel (doi dala maiuranza, un dala oposizion) ntan che i autri doi vën numinei dala pertes sozieles.
Obietif numer sies tl program fova l barat reguler danter la Provinzia y l capoluech provinziel. Nce tlo àn bele metù man y chësc tla forma d'ancuntedes reguleres danter l Presidënt dla Provinzia y l Ambolt adum cun i cumëmbri nteressei aldò di ciamps de lëur dla Jonta provinziela y cumenela. La proscima ancunteda unirà fata n vënerdì de chëst'ena.
Dlongia la realisazion dl program di sies obietifs àn te chisc prim 100 dis tëut mo na lingia de d'autra dezijions de mpurtanza, dantaldut chëla che reverda la tratatives curëntes sun la reforma dla costituzion y dl Senat, ma nce sun l'elaburazion nueva dla relazions finanzieles danter Roma y Bulsan. N à ntant nce nvià via la regulamentazion nueva dl sustëni dl'economia, l plann "Südtirol digitel 2020" per l putenziamënt dl e-government tl raport Provinzia autonoma y zitadins, l'agënda per l cumpletamënt dla vëta lergia sun l teritore y la preparazion dla lege nueva per la promozion culturela (na sort de Test unich dla cultura), la revijion di criteres dl DURP, l acorpuramënt dl sustëni per la cësa y l cuntribut al fit, l pachet de prupostes al Guviern per la reduzion dl mpaziamënt dlongia la A22, la garejeda publica per la gestion dla 26 sostes da mont dla Provinzia, l adatamënt dl sistem tarifer lià al Südtirol Pass. Y nia per ultim: la istituzion dla Cumiscion provinziela per l lëur y l ampliamënt dla mëisa de cunfront sun l lëur.
Tlo ie la imajes dla cunferënza stampa te n format n definizion auta.
USP
