Atualità
Aurì cun temperatöres sura le valur mesan
USP - Les temperatöres tratan le mëis de aurì é stades te döt Südtirol de circa 1,5 ćina dui degrà celsius sura le valur mesan di agn passà. Insciö él l`mëis de aurì le önejimo mëis indolater cun temperatöres sura le valur mesan di ultimi agn.
I meteorologhs dla Provinzia de Balsan à metü adöm n bilanz dl mëis de aurì prësc rové. A Balsan él gnü mosorè en valur mesan mensil de 14,9 degrà celsius, l`valur de confrunt di ultimi 30 agn é 13,0 degrà celsius. La temperatöra plü alta dl mëis é gnüda mosorada ai 7 de aurì a Branzoll y Auer tl raiun sot Balsan cun 26,8 degrà celsius. L`plü frëit él stè chësc mëis a Welsberg, olache al é gnü registré manco 5,9 degrà. Temperatöres ćiamò plü bases é gnüdes mosorades tles munts altes dla Schöntaufspitze (Sulden/Martell) a 3330 metri sura le livel dl mer cun manco 19,2 degrà.
Inće sce al à ploiü tröp ti ultimi dis à la cuantité dles prezipitaziuns diminuì n confrunt ai agn passà. La cuantitè dles prezipitaziuns amuntëia a n valur mesan dai 30 ai 50 milimetri.
Na gran cuantitè de polber dl desert dla Sahara é rové tl Südtirol tla pröma edema de aurì y á insciö influenzè les temperatöres. La gaujia por chësc avenimënt de coriosité é stades les tempestes de saorun tla Sahara, che à portè pići grani de saorun ćina tl zënter dl`Europa. La püćia plöia à fat a na moda che ma na pićia cunatité de stöp de grani de saorun é rovada ia pro tera.
rc
