Atualità
La mostra de Carlo Pescollderungg daurida incö tl Museum Ladin
USP -Incö, vëndres ai 9 de mà dl 2014 él gnü daurì la mostra “Carlo Pescollderungg. Coleziun de chertes postales” tl Museum Ladin Ćiastel de Tor a San Martin en presënza dl colezionist Carlo Pescollderungg y de Stefan Planker, diretur dl museum. Pro la mostra él da odëi indöt 350 chertes postales d´epoca dles valades ladines y an po jì a ti ćiarè debann ćina ai 29 de jügn.
Tl setëmber dl 2013 ti à le colezionist Pescollderungg da la Ila scinché al Museum Ladin 2.524 chertes postales d´epoca, de chëstes nen él gnü chirì fora 350 ejemplars da ti presentè al publich. Les chertes postales dla coleziun de Pescollderungg va zoruch ćina ala fin dl 18ejimo secul y röia amesa le 20ejimo secul. Les rapresentaziuns sön les chertes é na testimonianza storica de valüta por le monn ladin: insciö ne pon nia ma odëi i pröms ghesć che gnô adalerch, mo inće sciöche i jus y la contrada s´à trasformè ti secui.
Les tematiches plü rapresentades reverda les munts ladines, les üties da munt, i jus, i hotì storics y i paîsc da laôta. La seleziun dles chertes se basëia sön dui criters: la gran varietè dles localitês y le mudamënt dles tecniches de produziun dles chertes postales tratan i secui. N fenomenn che an po inće odëi tla rapresentaziun dla mostra é le svilup dla talianisaziun tles valades ladines por ejëmpl cun le passaje de üties da munt dal Alpenverein al C.A.I. y cun la sostituziun di inoms todësc cun inoms talians.
La mostra sarà da odëi ćina ai 29 de jügn dl 2014 dal mertesc ala sabeda (10:00 - 17:00) y la domënia (14:00 - 18:00) tl Museum Ladin.
rc
