Atualità
Ai 11 de mà él la festa dla uma: “Messun aumentè la liberté de dezijiun dles umes“
USP – En domënia, ai 11 de mà festejun la festa dla uma y insciö tol Waltraud Deeg, assessuria por la familia, chësta ocajiun por sotligné l´importanza da garantì ales umes la poscibilitè de podëi laurè inće tratan la maternitè.
La liberté de dezijiun dles umes é dependënta de chësc vers da na buna colaboraziun inanter i geniturs tratan la maternité: "Nia ma garanzies contratuales y sorvisc d´assistënza por i mituns, mo inće la colaboraziun te familia é n criter fondamental por podëi garantì ales umes la co-esistënza dla profesciun y dla maternitè", dij l´assessuria provinziala Deeg.
Tl Südtirol él ti agn passà n valur mesan de indöt 600 umes vigni ann che arbandonëia le post de laur por se dè jö cun la maternitè, dandaldöt tl setur dl´economia privata. "Les gaujes pê ester desvalies sciöche la manćianza de sorvisc d´assistënza por i pici, i orars de laûr y inće le dejidêr da avëi plü tëmp a desposiziun por i mituns y la familia", spliga Deeg.
Deplü garanzies à les umes che laora tl´aministraziun publica dla Provinzia: an à porvè da jì adiuncuntra ai bojëgns cun orars de laûr flessibls, ocupaziuns a tëmp parzial o part-time, vacanzes straordinaries y garanzies por ći che reverda le post de laur. La Provinzia sostëgn inće adöm ala Ćiamena dl Comerz de Balsan le proiet "Audit Familia&Laur" che mira a n´economia privata plü dlunja ales families. "Por aumentè la liberté de dezijiun dles umes tratan la maternité él important da avëi inće tla economia privata na maiù garanzia dl post de laur y da miorè i sorvisc d´assistënza por i pici y les piceres", dij l´assessuria Deeg y sotlignëia tl medemo momënt che la colaboraziun tra i geniturs dess inće jì te chësta direziun.
rc
