Atualità
Deplü practicums por jogn y jones tratan les vacanzes de scora
USP - La comisciun provinziala por le laûr à aprovè l´arlunjamënt di practicums por jogn y jones tles vacanzes da scora y université da 6 a 10 mëisc y pormënt inće ales aziëndes zënza dependënć da pité practicums à studënć y studëntes.
En valur mesan de 4.500 practicums al´ann à i studënć y les studëntes fat te döt Südtirol tratan i ultimi agn. Les previjiuns por le 2014 é en aumënt. La comisciun provinziala por le laûr à aprovè en mudamënt che pormët inće a dites y aziëndes zënza dependënć (sciöche por ejëmpl artejans o profescionisć lëdi) de ofrì practicums tratan les vacanzes de scora.
Implü à la comisciun provinziala por le laûr, che é metüda adöm da rapresentanc dla provinzia y da organisaziuns soziales, aprovè da püch tratan süa sentada inće l´arlunjamënt dla dorada di practicums da 6 mëisc a indöt 10 mëisc. „Cun chisc dui mudamënć unse porvè da acontentè i bojëgns di studënć y dles studëntes y insciö da ti pité na maiù poscibilité da imparè a conësce le monn dl laûr", dij Martha Stocker, assessuria provinziala por le laûr. Ala fin dl´ann 2014 saràl spo da fà na valutaziun dles conseguënzes y di mioramënć efetivs de chësta modaziun, dij Stocker.
Helmuth Sinn, diretur dla repartiziun provinziala por le laûr, interpretëia chësta modaziun sciöche n aumënt probabl di practicums ti proscimi mëisc: „Adöm ala desponibilité di sindacać sun stà bugn da aprovè chësta modaziun y insciö el plü daturs de laûr che pò pité practicums ai studënć y ales studëntes tratan les vacanzes".
rc
