Atualità
EURES Trans Tirolia: Cooperaziun por mioré les poscibilitês sön le monn dl laûr
USP – Mioré les poscibilitês sön le monn dl laûr tl Südtirol: chësta é stada la tematica zentrala tratan na incuntada da püch dla comisciun diretiva dla cooperaziun sura-provinziala EURES TransTirolia a Desproch , metüda adöm da rapresentanc dl Tirol, dl Südtirol y di Grijuns. Helmuth Sinn, diretur dla repartiziun provinziala por le laûr é atualmënter inće le presidënt dla EURES Trans Tirolia.
L´EURES Trans Tirolia à sciöche obietif zentral la promoziun dl'ocupaziun sura-provinziala tra Südtirol, Tirol y i Grijiuns. La Trans Tirolia fej pert dl ofize de mediaziun dl laûr europeich EURES (european employment services).
Dla comisciun diretiva dla EURES fej pert Helmuth Sinn,diretur dla repartiziun provinziala por le laûr, Toni Kern, aministradù de Arbeitsmarktservice Tirol, Paul Schwendener, scef dl´ofize por la industria, l'artejanat y le laûr dl Ćiantun di Grijiuns, Bernhard Achatz, diretur dla repartiziun por ći che reverda le dërt de laûr dla ćiamena dl comerz dl Tirol y Peter Hofer, le secretêr provinzial dla assoziaziun di sindacać ÖGB tl Tirol.
La chestiun zentrala tratan la sentada dla comisciun diretiva dla EURES Trans Tirolia ê les poscibilites da miorè la situaziun sön le monn dl laûr tl Südtirol. „Le stat federal dl Tirol y le Ćiantun di Grijiuns à por le momënt deplü ofertes sön le monn dl laûr confrontè cun Südtirol", spliga Helmuth Sinn, presidënt dla EURES. „Porchël sarà öna dles nostes prioritês inće da fà conësce ala jënt tl Südtirol les poscibilitês de laûr tles regiuns confinantes. Tl Tirol por ejëmpl éle en gröm de posć da lerneri lëdi", insciö Sinn.
Ti proscimi mëisc gnaral organizè de plü sentades por valutè mosöres de sostëgn concordades dales trëi regiuns y inće por analizé les tematiches y situaziuns iuridiches desvalies dles regiuns sön le monn dl laûr.
Deplü informaziuns sön l´EURES Trans Tirolia pon ćiafè chilò: http://www.eures-transtirolia.eu/, plata internet olache al vëgn inće pité posc de laûr lëdi: al momënt él 3.400 posć lëdi tl Tirol, 100 ti Grijiuns y 800 tl Südtirol.
rc
