Atualità
L'insegnamënt scolastich por migranć, implanć de biogas, Euregio y la spligaziun di monumënć dl fascism
USP - La regolamentaziun por implanć por la produziun de biogas, i proscimi vari por l´inserimënt te n cheder y n contest storich di relić dl fascism y dl´integraziun de mituns migranć y mitans migrantes: chëstes é stades les tematiches plü importantes dla sentada da incö, mertesc ai 20 de mà dl 2014, dla Junta provinziala a Balsan.
Öna dles chestiuns tratades incö dala Junta provinziala é stada l´ampliamënt dl'insegnamënt di lingać por mituns migranć y mitans migrantes tles scores tl Südtirol. La presënza de scolars migranć y de scolares migrantes é aumentada ti ultimi agn y röia atualmënter a prësc 9.000 mituns y mitans tles scores dla Provinzia, con na gran prozentuala tles citês y tles fraziuns de Balsan y Maran.
Öna dles prioritês por l' integraziun soziala y scolastica é por Philipp Achammer, assessur por la scora y cultura todëscia, la promoziun dl'insegnamënt di lingać ofiziai dla Provinzia. Por miorè l'insegnamënt á Achammer presentè incö le program aprovè dala Junta provinziala y partì sö te trëi perts. La pröma pert prevëiga l'ampliamënt dl sostëgn finanziar de indöt 1 en miliun de euro ai zëntri por l'insegnamënt dl lingaz. Chisc zëntri linguistics por scolars y scolares pò gnì anuzà fora dl'orar scolastich por imparè i lingać y i zëntri sostëgn insciö inće l´inserimënt di mituns y dles mitans tla sozietè. "La secunda pert é basada sön na formaziun suplementara y specifica di insegnanć, inće por capì damì i debojëgns di scolars y dles scolares", spliga Achammer. La terza pert dl progam é basada sön la colaboraziun de volontars, che se mët a desposiziun por ores de sostëgn ai mituns y ales mitans. "Chilò unse ponsé por ejëmpl a insegnanć en ponsiun che oress se mët a desposiziun por insigné", insciö Achammer.
L´assessur Philip Achammer à inće splighé incö le plann por la colaboraziun culturala sura-regional dla EUREGIO aprovè incö dla Junta y che prevëiga na maiù colaboraziun culturala dles provinzies dl Südtirol, dl Trentin y dl Tirol. "Te agost él preodü na incuntada a Balsan di assessurs provinziai por la cultura taliana, todëscia y ladina adöm cun i assessurs por la cultura dl Trentin y dl Tirol por cherié la basa formala por la colaboraziun", spliga Achammer.
Le Presidënt dla Junta Provinziala, Arno Kompatscher à referì incö tla conferënza stampa do la sentada dla Junta a Balsan che la Provinzia s'à acordè adöm al Comun da Basan y al Stat talian ćiafè deboriada na soluzion al´inserimënt di relić dl fascism te n contest storich. "Por ći che reverda le monumënt dla Vittoria él preodü che le zënter de documentaziun sot le monumënt dess gnì daurì le 27 de jügn", spliga Kompatscher. Le grup de laûr che à elaborè les propostes por le zënter de documentaziun é inće gnü inciariè da portè dant propostes por ći che reverda les formes de na spligaziun storica dl relief de Mussolini che é da ćiafè söl palaz dl tribunal a Balsan. "Por inserì chisc monumënc dl tëmp dl fascism te n contest storich de spligaziun laorunse por ćiafè deboriada na soluziun coletiva, deache orun jì inant ma en concordanza con le Comun y cun i rapresentanc statai", insciö Kompatscher.
Implü à la Junta Provinziala inće regolamentè incö te süa sentada i critêrs d'aprovaziun por la costruziun de implanć por la produziun de biogas. "Te en gröm de implanć é la produziun de energia nia tan alta da podëi sostignì i cosć y tl dagnì podaral ma gnì fat sö implanć nüs sce la produziun é economicamënter inće rentabla", spliga le presidënt dla Junta Kompatscher. Implü dess la costruziun de implanć nüs por la produziun de biogass nia ester la gaujia por n aumënt esagerè de tiers tla contrada, spliga Kompatscher.
rc
