Atualità
Incuntada d’esperć dl setur agrar a Balsan
USP - „Na maiù colaboraziun danter les Regiuns tles Alpes y dandaldöt danter i Istituć d’arichida à na gran importanza por le svilup dl’agricoltöra“: Chëstes les parores dl’assessur Schuler tratan na incuntada stada da püch a Balsan cun esperć dl setûr agrar dl Südtirol, dl Tirol, da Payern, dl Trentin, dla Val d’Aosta y dl Friul.
Bele da agn é la colaboraziun danter les Regiuns tles Alpes ativa y öna dles prioritês che é gnüda debatüda tratan la sentada a Balsan é la realisaziun de na scemplificaziun dl normes y dles presciziuns por piceres aziëndes che laora tl'agricoltöra. Anton Dippold, diretur dl'Istitut por les politiches agrares dl Payern à rengrazié le diretur dla repartiziun provinziala Martin Pazeller por avëi tut sö i contać y avëi insciö costruì na rëi de relaziuns y incuntades danter i rapresentanć dles regiuns desvalies. Tratan la incuntada él inće gnü debatü dla proposta dl'assessur Arnold Schuler y de Pazeller fata a Hans-Erwin Barth, diretur dla repartiziun agricola dla Uniun Europeica che trata la promoziun y le marketing dl „ćiajò dles Alpes". Por la proposta à mostrè gran interès Francesco Minussi, diretur di seturs dl'agricoltöra y dl'economia forestala dla Regiun dl Friul y Corrado Adamo, diretur dla repartiziun dla Val d'Aosta.
Gottfried Moosmann dla Junta provinziala dl Tirol à splighé che le ćiajò é tl Tirol al pröm post por ći che reverda la venüda de produć da paurs, mo che cun n aziun de marketing podessun inće comuniché la tematica dl'agricoltöra da munt.
Por portè inant chësta proposta de n aziun de marketing coletiva por la promoziun dl ćiajò alpin à Anton Dippold presentè sciöche ejëmpli de colaboraziuns sura-regionales garatades le proiet "AgriCultura" y le proiet "Arge Alp - Safeguard for Agricultural Varietes in Europe SAVE". Por la realisaziun dl proiet él important che al ne vëgn nia aumentè la regolamentaziun y les normes legislatives por la produziun ed ćiajò por les piceres aziëndes agricoles, deach sceno él le prigo da les desfà cun n cheder normatif massa detaiè.rc
