Atualità
La stlüta dles strades dl Ju dl Stelvio y dl Rombo é gnüda sospenüda
USP - Da inier mertesc, é la strada che porta sön le Ju dl Stelvio indô daverta al trafich, y da indoman jöbia, gnarà inće la strada che porta sön le Ju dl Rombo daurida. „Les gran cuantitês de nëi é stades chësc ann na sfidada nia da püch por le Sorvisc Strades dla Provinzia y porchël messunse rengrazié düć canć por le gran laûr che é gnü fat“, dij l’assessur por le Sorvisc Strades Florian Mussner.
La tapa dla gara dles rodes dl Giro d'Italia da inier n'é nia ma stada n avenimënt sportif de gran interès mo ara à inće inauguré le mëteman dla sajun da d'isté por le trafich sön la strada che porta sön le Ju dl Stelvio. Avisa do che la gara dles rodes é rovada é la strada gnüda daurida ofizialmënter por le trafich da vigni dé. La medema cossa é preodüda indoman sön la strada che porta sön le Ju dl Rombo, olache al é gnü jö de gran cuantitês de nëi tratan döt l'invern. „Nia ma les gran novüdes, mo inće i dagns che la nëi à gaujé ales proteziuns cuntra les lovines dlungia les strades à portè pro a n aumënt dl laûr da pert dl Sorvisc Strades", spliga Mussner. Bele da Pasca incà vegnël laurè por arjigné ca la strada por la daurida, inće en colaboraziun cun la Comisciun provinziala por les lovines, che valutëia i prighi de lovines y che dà jö arać sön la segurëza dla strada.
rc
Galaria dales fotografies
