Atualità
Ejams de Bi- y Trilinguism: L’iscriziun online à bele arjunt le 15% dles iscriziuns
USP – Ćina sëgn s’à scrì ite online söporjö 700 porsones ai ejams de bi- y trilinguism. L´iscriziun diretamënter dal computer é ativa dai 15 de novëmber incà y funzionëia cun la Cherta di sorvisc. Nia ma les porsones residëntes tla provinzia de Balsan po se scrì ite ai ejams cun la Cherta di sorvisc, mo inće düć chi che à la residënza te n’atra regiun dla Talia.
USP - Ćina sëgn s'à scrì ite online söporjö 700 porsones ai ejams de bi- y trilinguism. L´iscriziun diretamënter dal computer é ativa dai 15 de novëmber incà y funzionëia cun la Cherta di sorvisc. Nia ma les porsones residëntes tla provinzia de Balsan po se scrì ite ai ejams cun la Cherta di sorvisc, mo inće düć chi che à la residënza te n'atra regiun dla Talia.
I numeri dij che tres de plü zitadins adora la Cherta di sorvisc por se scrì ite online ai ejams de bi- y trilinguism y por fà domanda por le reconoscimënt de zertificać linguistics o de zertificać de stüdi foradecà. L'iscriziun online, che an po fà cun baldëza da ćiasa dan le computer, é gnüda adorada ćina sëgn da presciapüch 700 porsones. Chël ô dì che al é gnü registré na prozentuala de 15 porcënt de iscriziuns online a confrunt dles iscriziuns fates a man sön le papier. La condiziun por podëi fà l'iscriziun online é na Cherta di sorvisc ativa y n codesc PIN personal che an po damanè do tl comun de residënza.
"Le conzet dla Cherta di sorvisc é gnü realisé adoran standarg statai y insciö é le sorvisc desponibl por düć i zitadins tl raiun talian. Implü él n vare inant tla digitalisaziun di sorvisc publics por i zitadins", spliga le Presidënt dla Junta provinziala Arno Kompatscher.
"L'iscriziun online ai ejams de bi- y trilinguism é dër scëmpla", dij l'assessuria por l'informatica Waltraud Deeg. Do che an à chirì fora sön le portal internet dla Rëi Zivica ći ejam ch'an ô fà y do che an à ativé la Cherta di sorvisc cun le codesc PIN personal pon chirì fora danter i sorvisc pità, sciöche por ejëmpl l'iscriziun ai ejams o la zertificaziun de titui de stüde. "Sce an à stlüt jö la scora alta te un n lingaz y l'Université te n ater lingaz, spo pon inće damanè le reconescimënt automatich dl livel A dl bilinguism", insciö Deeg.
I vantaji dla digitalisaziun di sorvisc por i zitadins é tröc: i tëmps de resposta da pert di ofizi competënć é plü cörć, an se sparagna la prozedöra lungia da scrì fora a man y menè demez l'iscriziun y cun la Cherta di sorvisc pon inće adorè d'atri sorvisc a livel statal, sciöche por ejëmpl pro l'INPS, pro le Ministêr por i afars foradecà o pro l'Agenzia dles entrades. De plü informaziuns sön la Cherta di sorvisc pon ciafè por talian y todësch.
rc
