Atualità
Incuntada por combate le moscorun tigra: “L’aiüt da pert dla popolaziun é essenzial”
USP - Prevenziun y sensibilisaziun: chësta é la rezeta cuntra le moscorun tigra, che é gnüda portada dant incö tratan na conferënza stampa a Leifers dal’Agenzia provinziala por l’ambiënt, le Laboratore biologich dla Provinzia y l’Ofize sanitè publica.
I pröms ejemplars dl moscarun tigra s'à bele lascè odëi tl Südtirol tratan le mëis de aurì, y cun le gran ćialt che röia adalerch d'iste él preodü n gran aumënt de chisc inseć prigorusc. L'Agenzia provinziala por l'ambiënt à bele metü a jì n'ejaminaziun statistica sön la presënza di moscaruns tigra y por aumentè la poscibilitè de proteziun cuntra i moscaruns él i ofizi provinziai competënć che basëia süa comunicaziun sön dui conzeć: la sensibilisaziun y la prevenziun.
"Les inrescides che i ùn fat tl mëis de mà y che i fajaràn inće ti proscimi mëisc é fondamentales por podëi ciafè fora de plü informaziuns y dać sön la difujiun di moscoruns tigra sön nosc teritore, inće por costruì insciö la basa por la prevenziun", spliga Alberta Stenico, direturia dl Laboratore biologich dla Provinzia. Les ferides da morta de chisc inseć, che é rovà adalerch tl Südtirol da n per de agn, é prigoroses, deache le moscorun tigra trasportëia inant maraties da d'atres perts dl monn. "Un di prighi plü gragn dl moscorun tigra é chël che al se tol para patologies esotiches che i ne conesciun nia chilò da nos", spliga Josef Simeoni, primar dl Ofize sanitè publica.
"Por avëi sot a control le problem ne bàstel nia ma da atuè dötes les mosöres preodüdes dala provinzia, dai comuns y dai ofizi competënć dla sanitè publica, mo al é inće fondamental da laurè sön la prevenziun y insciö da informè deplü la popolaziun", dij l'assessur provinzial Richard Theiner.
I dui consëis prinzipai che é gnüs spligà tratan la conferënza stampa por se parè dai prighi dl moscorun tigra é: evité le plü che ara va racoiüdes de ega alaleria, por ejëmpl te condles o sëdles, y cuntra la formaziun de coes él da adorè produć che archita le svilup dles larves. Les zones cun la plü gran presënza de moscoruns tigra é i raiuns dlungia Balsan, Maran y Leifers.
Por de plü informaziuns pon inće ti ćiarè la plata internet: http://www.provinz.bz.it/umweltagentur/umwelt-gesundheit/tigermuecke.asp
rc
Galaria dales fotografies
