Atualità
La Provinzia y les organisaziuns stabilësc les prioritês
USP - Por podëi stabilì na lista de prioritês ajornada s’à incuntè da püch l’assessuria por les politiches soziales Martha Stocker adöm cun le diretur de repartiziun Luca Critelli cun indöt 90 rapresentanć de organisaziuns a Kardaun. „N program unitar por ći che reverda les politiches sanitares y soziales va debojëgn, inće por stlarì les prioritês tl setur sanitar y sozial“, dij Stocker.
Insciö él gnü organisé tratan la incuntada tl zënter sozial KIMM a Kardaun de plü grups de laûr che à tratè cater tematiches prinzipales por podëi determiné les prospetives zentrales por le dagnì. Tratan i workshops él gnü laurè y debatü son les nezescitês, les dificoltês, les prospetives, les evoluziuns y les prioritês tl setur sozial y sanitar dla Provinzia.
"Por ejëmpl unse stabilì sciöche prioritês por i proscimi agn l'integraziun tl monn dl laûr dles porsones cun handicap y dles porsones atempades, la revijiun dl cheder legislatif por les porsones cun handicap, mo inće aspeć nüs dles formes por l'abité", spliga Martin Telser, presidënt dla federaziun por les politiches soziales y por la sanité.
Por ći che reverda le finanziamënt dles mosöres à Giulia Failli, vizepresidënta dl Legacoopbunds, cumpedè sö la razionalisaziun y la recapitulaziun di sorvisc publics, le smendrimënt dla burocrazia y l'atuaziun dl prinzip de na maiù responsabilité locala sciöche les formes primares de na reorganisaziun di mesi finanziars a desposiziun.
„Impröma messon stlarì cai che é i sorvisc che vëgn pità dal setur publich por podëi insciö definì inće i sorvisc preodüs da pert de privać; por i privać val inće debojëgn da avëi segurëza por ći che reverda le cheder legislatif y la planificaziun", spliga Wolfgang Obwexer, diretur dl'assoziaziun onlus „Lebenshilfe", che à tratè adöm cun n grup de laûr la tematica dles organisaziuns „non profit".
"Por les porsones che s'anüza di sorvisc val debojëgn de lignes diretives tleres, de manco burocrazia, de na registraziun unitara por les organisaziuns y de n zënter informatif general", dij Paolo Marcato, diretur de "La Strada - der Weg" y portausc de so grup de laûr.
L'assessuria por la sanité y les politiches soziales à ascutè sö düć i intervënć y à porvè insciö da stabilì les prioritês por le dagnì. „Öna dles mosöres preodüdes por jì adincuntra a na colaboraziun plü ampla di seturs dles politiches soziales y dla sanité é la lege „omnibus" che prevëiga na portina unitara por trami i seturs". Implü él important da stlarì cai che é i sorvisc che vëgn pità dal setur publich y ći sorvisc che foss damì che les organisaziuns privates podess pité inće a n prisc plü bas, insciö Stocker che sotlignëia che, por ći che reverda les organisaziuns fóssel damì da avëi plü segurëza legislativa inće por la planificaziun y che na registraziun unitara por les organisaziuns podess ester na forma poscibla por le dagnì.
L'assessuria Stocker recorda inće che la Provinzia mëss jì danfora cun le bun ejëmpl por ći che reverda l'integraziun de porsones cun handicap sön le post de laûr y che les ordinaziuns de laûr por les cooperatives gnarà partides sö inće en conscidraziun dla presënza de lauranć cun n handicap tles cooperatives, insciö Stockerrc
