Atualità
L' app nöia „Meteo Südtirol“ é desponibla da incö (24.06) inant
Ćiarè do ales previjiuns dl tëmp te Südtirol devënta tres plü saurì: insciö n’él nia ma gnü amplié da pert dl Sorvisc meteo dla Provinzia la plata internet cun na verjiun mobila por zelulars, mo da śëgn inant pon inće lì do les previjiuns dl tëmp cun l’app nöia „Meteo Südtirol“.
L’app nöia é desponibla por android y iOS (iPhone), sciöche inće por tablets. Implü él inće poscibl da odëi les previjiuns dl meteo tres n widget sön i smartphones che anüza android. L’app é desponibla te cater lingać: ladin, todësch, talian y inglesc.
„Cun l’app ne pon nia ma ćiarè do ales previjiuns dl tëmp te Südtirol, mo inće ales previjiuns dl tëmp da munt y dl tëmp ti raiuns dla provinzia cun informaziuns partides sö en pert inće por vigni comun“, spliga Günther Geier dl Sorvisc meteo dla Provinzia de Balsan. “Por evënć che reverda la proteziun zivila podunse implü inće informè i zitadins cun segnalaziuns importantes tres l’app cun n messaje PUSH”, dij le diretur de departimënt Hanspeter Staffler y sotlignëia insciö l’importanza dles formes nöies de comunicaziun sciöche sorvisc eventual d’informaziun d’emergënza.
„L’app nöia é n strumënt modern por dötes les porsones y che é, por motifs de laûr o tratan le tëmp lëde, gonot alaleria. I pënsi chilò por ejëmpl ai paurs y a düć chi che laora tla natöra“, dij l’assessur por l’agricoltöra y economia forestala Arnold Schuler.
L’applicaziun nöia é gnüda svilupada dala „Südtirol Informatik AG SIAG“. “L’app dl Sorvisc meteo dla Provinzia de Balsan é n proiet inovatif”, dij l’assessuria por l’informatica Waltraud Deeg che sotrissëia che chësta inovaziun fej pert dla strategia dla junta provinziala de anuzé deplëgn les poscibilitês dla tecnologia informatica tres deplü por promöie na comunicaziun direta y scëmpla cun i zitadins.
Da ciafè sön:
Google Play Store (Android):
https://play.google.com/store/apps/details?id=it.siag.weather&hl=de
Apple App Store (iOS):
https://itunes.apple.com/de/app/meteo-alto-adige-wetter-sudtirol/id887929235
rc
Galaria dales fotografies
