Atualità
Museum Ladin: N dì sun la geologia y l se furmé dla Dolomites
Tl Museum Ladin Ciastel de Tor a San Martin ie la geologia y la storia dla furmazion dla Dolomites tl zënter uni merdi dai 1 de lugio ai 2 de setëmber. Danmesdì possa la/i vijitadëures analisé pieres y fossii locai, domesdì pieta l Museum n culaborazion cun l Ufize parcs naturei na jita meneda sun l troi geologich de Sas de Putia. L ie de bujën de se prenuté.
Tl 2009 ie pertes dla Dolomites unides recunesciudes coche Patrimone naturel dla UNESCO, ajache les forma na lingia de cuntredes da mont de na belëza unica, che faszinea cun si monumentalità y richëza de culëures sdredies de viagiadëures y ie na funtana meifineda de nterpretazions scientifiches y artistiches.
Uni merdi dai 1 de lugio ai 2 de setëmber dedichea l Museum Ladin Ćiastel de Tor perchël dut l dì al’arpejon naturela dla UNESCO-Dolomites.
Danmesdì (dala 9.00 ala 10.00 tla rujeneda tudëscia, dala 10.00 ala 11.00 tla rujeneda taliana) mëina n paleontologh tl Museum Ladin Ćiastel de Tor a San Martin de Tor duta la persones nteressedes tres la storia dla furmazion dla Dolomites. Chi che tol pert possa pië ite la pieres y i fossii per i cunëscer y i analisé (cumpëida de almanco 5 persones).
Domesdì vala pona inant cun cun n acumpaniamënt spezialisà ora per l parch naturel Puez-Odles tla Val Badia. La partezipantes y i partezipanc jirà deberieda a fé l troi geologich sun Sas de Putia. Da iló àn na ududa te una dla furmazions geologiches plu mpurtantes dla Dolomites. La luegia d’ancunteda y de partënza dla jita ie la plaza dai auti sun l Jëuf de Börz dala 14:30. N furnerà de reviers ntëur la 17:30.
La partezipazion a tramedoi scumenciadives costa de ndut set euro. L ie de bujën de na prenutazion che possa unì fata sibe tl Museum Ladin sot al numer de tel. 0474 52 40 20 o te un di ufizies dl turism dla Val Badia.
La jita meneda vën urganiseda dal Museum Ladin n culaborazion cun l Ufize Parcs naturei.
De plu nfurmazions tl Museum Ladin Ciastel de Tor, Streda Tor 65, San Martin de Tor, Tel. 0474 52 40 20 y tl iternet sot a www.museumladin.it.
USP
Galaria dales fotografies
