Atualità
Ofize idrografich: Jügn ćialt sura le valur mesan
Temperatöres plü altes y püćes prezipitaziuns: Chësc é le ressümé di meteorologs dl Ofize idrografich dla provinzia de Balsan por le mëis de jügn.
Do che le mëis à metü man cun temperatöres scialdi basses, él rové adalerch tla secunda edema de jügn vënć cun n'aria subtropica che à portè a n cambiamënt dl’tlima cun na ona de ćialt. Les temperatöres plü altes é gnüdes mosorades ai 8 y ai 10 de jügn a Porsenù, Balsan y Auer cun 34,8 degrà celsius. Dô chësta ona de ćialt s’à les temperatöres stabilisé y le tëmp é romagnü variabl. Les temperatöres plü altes é scialdi romagnüdes sot ai 30 degrà. Inier, domënia ai 29 de jügn, él gnü registrè na ona de frëit che à portè a tröpes prezipitaziuns, cun, en pert, na cuantité de plöia ćina sura ai 45 milimetri.
La temperatöra plü basa tles valades tl Südtirol, secundo i meteorologs, é gnüda mosorada tl comun de Prags cun 1,8 degrà. La temperatöra plü basa de jügn sön les munts é gnüda registrada ai 1. de jügn a 3328 metri sön la Schöntaufspitze tl raiun dl Ortles cun manco nü degrà.
I dać dles staziuns dl tëmp dij che le mëis de jügn é stè plü ćialt en confrunt ai ultimi agn. A Porsenù y a Sterzing àn podü registré le maiù aumënt dles temperatöres cun presciapüch 1,3 degrà deplü en confrunt al valur mesan.
Por ći che reverda i dać sön la cuantité dles prezipitaziuns à la gran pert dles staziuns registré n valur negatif en confrunt al valur mesan: a Bornech él insciö ma tomè le 65 porcënt dla plöia usuala, a Balsan le 79 porcënt.
Les previjiuns por chëst’edema dij che le tëmp dess romagne variabl ćina en mercui, ai 2 de messè, cun n aumënt dles temperatöres da en jöbia inant, insciö anunziëia i meteorologs dla provinzia.
rc
