Atualità
La plata internet sön la pröma vera mondiala é online
“Incö dales cater domisdé pëia ia ofizialmënter le portal internet dla Euregio che é dediché ala pröma vera mondiala”: chësc à dit incö (al 1. de messé) le Presidënt dla Junta Arno Kompatscher do la sentada dla junta. L’ativaziun dla plata internet nöia, che gnarà ajornada te dui, proscimamënter trëi lingać, é n proiet por aumentè la cosciënza dla popolaziun sön chësta tematica
La plata internet dedicada ala pröma vera mondiala dal 1914 – 1918 é da ciafè sot ala misciun www.14-18.europaregion.info da incö, mertesc al 1. de messé, dales cater domisdé inant. La plata internet, cun contignüs interatifs, é gnüda realisada tres la colaboraziun danter i presidënć dles trëi provinzies dl Südtirol, dl Tirol y dl Trentin. Insciö gnarà la plata internet tres ajornada cun manifestaziuns y scomenciadies dedicades ala recordanza centenara dla vera. La plata internet é dandaldöt ponsada por la jonëza y por tì porté plü daimprò ai jogn i avenimënć dla vera che é rovada baldi ćina tles valades ladines.
Inće por les scores pon ciafè sön la plata internet material didatich interessant y d’ütl da desćiarié. Implü vëgnel pité la poscibilité por jornalisć, storics y interessà da colaborè ativamënter al ajornamënt dla plata cun contribuć, essays o idees interessantes.
rc
