Atualità
Amarà cronics: La prescriziun de medijines vëgn scemplificada
Ćina śëgn podô porsones cun maraties croniches y rares sciöche inće cun n’invalidité se lascè scrì dal dotur por vigni rezeta ma döes confeziuns de medejines por la dorada de dui mëisc. “Da śëgn inant se scemplifichëia la situaziun cotan: por vigni rezeta pon damanè sis confeziuns de medejines por terapies ćina mez n ann”, spliga l’assessuria Stocker.
Chësta mudaziun é gnüda poscibla por mirit de na desposiziun statala nöia, che é en forza da öna n'edema. Atualmënter él tl Südtirol 27 porcënt di zitadins che patësc de maraties croniches o rares o de n’invalidité, insciö Alfred König, diretur dl Ofize Raiuns sanitars. “Chësta mudaziun à sciöche conseguënza che düć i amarà cronics mëss jì manco iadi dal dotur por se fà scrì na rezeta por medejines”, dij l’assessuria por la sanité Martha Stocker.
Sciöche preodü dal articul 26 dl decret legislatif dl 24 de jügn 2014, nr. 90, po i doturs dal 25 de jügn inant scrì indöt sis confeziuns de medejines por rezeta, por la dorada dla terapia de indöt 180 dis. A condiziun che la medema medejina sides bele gnüda adorada por la cura dla maratia por almanco sis mëisc dan dala prescriziun nöia.
rc
