Atualità
Autoritês de livel alt s’à incuntè a Ćiastel Prösels
Autoritês de livel alt y segnai tlers: Nia ma i chefs dl govern Matteo Renzi y Werner Faymann, mo inće i trëi Presidënć dles provinzies Arno Kompatscher, Günther Platter y Ugo Rossi à dè incö (5 de messè) tratan le convëgn de Ćiastel Prösels a Fié segnai tlers por na maiù colaboraziun danter les regiuns tl‘Europa y por n renforzamënt dles regiuns por le proiet d’integraziun europeich.
Le Presidënt dla Provinzia Arno Kompatscher à recordè tratan so discurs, en presënza di dui suranstanć dl govern, le combatimënt lunch dl Südtirol por la proteziun dl’identité locala y à nominé l’autonomia sciöche ejëmpl por la proteziun dles mendranzes. Le proiet dl’Euregio é te chësc vers n vare inant, na picera Europa tles Alpes, sciöche n ejëmpl de na colaboraziun garatada, insciö Kompatscher. “Nosta ghiranza é incö chëra da damanè la colaboraziun y l’aiüt dla Talia y dl’Austria por renforzè chësc proiet esemplar de colaboraziun suraregionala y europeica.”
Werner Faymann, le suranstant dl govern austriach, à fat te so discurs la domanda sön cares che podess ester les mius respostes de colaboraziun ai problems atuai: “Le prinzip de na colaboraziun é impröma la constataziun che un su ne é nia bun da ciafè na soluziun”, insciö Faymann. L’obietif é insciö na colaboraziun leala y onesta danter les regiuns y les istituziuns politiches sön de plü livì. “Les Regiuns é öna dles istituziuns politiches che é plü daimprò ala popolaziun, mo impò ne po nia vigni chestiun gnì stlarida a livel dles Regiuns, inscö le Presidënt Faymann. “L’Europa à debojëgn de svilups sön chestiuns siöche l’archirida, la competitivitè, mo ara adora inće onesté y coretëza.” Öna dles gran domandes di proscimi mëisc sarà porchël inće co fa sö y costruì n prinzip de coretëza y colaboraziun onesta a livel europeich”, à dit Faymann.
A öna cun le discurs de Faymann s’à mostrè le suranstant dl govern talian Matteo Renzi. “L’incuntada da incö nes porta inće zoruch tl tëmp. Dan da 100 agn él gnü combatü na vera chilò, al gnô fat sö fosses da combatimënt y tunels por les ferates”, insciö le premier che à sotrissé che: “Sce nos düć orun colaborè por le dagnì, spo ne podun nia stè chić tl tëmp passè, mo gnanca tl presënt.” Renzi à spo inće recordè tratan so discurs le bun funzionamënt dla provinzia de Südtirol sciöche ejëmpl por l’Europa: “Chësc raiun é n ejëmpl por döta l’Europa. Chilò vëgn l’Europa odüda sciöche na poscibilité y nia sciöche n inćiamp. Al va debojëgn da copié les idees de proieć che funzionëia, insciö Renzi.
La Ministra taliana por les Regiuns Maria Carmela Lanzetta à sotrissé che la crisa à portè a na inclinaziun versc na zentralisaziun dl’organisaziun statala y europeica: “Al ne po nia nasce döes perts dl’Europa, öna di Stać mëmbri y öna dles Regiuns, mo ma öna che é basada söla colaboraziun danter i Stać mëmbri y les Regiuns”. Al é fondamental de portè ite deplü les regiuns tla politica, insciö Lanzetta. Les regiuns dl Trentin, dl Südtirol y dl Tirol é insciö de bugn ejëmpli por se arjigné ca ales sfidades dl dagnì. “Ares é bele sëgn te na posiziun, da olache ares po respogne ales sfidades y al svilups atui”, insciö Lanzetta.
Le Presidënt dla Provinzia de Trënt Ugo Rossi à recordè tratan le convëgn che l’aministraziun publica, la responsabilité y la solidarieté é carateristiches prinzipales dles Regiuns dles Alpes y che le raiun suraregional dl Euregio podess insciö deventè n labor de colaboraziun por la convivënza: “Le raiun dl’Euregio é n proiet de daurida europeica”, à dit Rossi che à injuntè, “Nos un la basa por elaborè y costruì n model nü dl aministraziun publica, n model de n’autonomia sterscia n dialogh danter de plü livels dles istituziuns politiches”. Öna dles speranzes dl Presidënt dla Provinzia Rossi é che le Stat talian toles deplü n conscideraziun les scomenciadies dles provinzies y che al sostegnës insciö inće les reformes preodüdes pro renforzè i statuć d’autonomia.
La colaboraziun suraregionala dles trëi Provinzies é stada al zënter dl discurs dl Presidënt dl Tirol Günther Platter: “Cun chësta colaboraziun y alianza suraregionala unse fat n vare vers le dagnì, le proscimo vare é la formaziun de na “Macroregiun dles Alpes”, insciö Platter. Chësta formaziun é do la minunga de Platter n vare nezesciar por ti dè n maiù pëis politich al’Euregio. “Les forzes prinzipales é l’Euregio y le Paiern, bele tl isté dl 2015 oressun mët sö les fondamëntes por l’istituziun y la colaboraziun de chisc dui aparać politics. I temesc zentrai sarà la politica unitara por n’alirisaziun dl trafich y la creaziun de plü independënza energetica”, insciö Platter.
De plü fotos dl'incuntada sön Ciastel Prösels pon ciafè chilò:https://www.facebook.com/media/set/?set=a.669424679779496.1073741872.124810064240963&type=3&uploaded=4.
rc
