Atualità
Renzi y Kompatscher al BBT: Renzi confermëia l’impëgn dl govern
Acompagné dal Presidënt dla Junta Arno Kompatscher y dal minister por les Infrastrotöres Maurizio Lupi à le Presidënt dl Consëi di Ministri Matteo Renzi vijité incö (05/07) le cantier dl tunel de basa dl Prener BBT a Mauls. “Chilò vegnël fat sö n tunel por lié adöm dui raiuns“, à dit Renzi y à inće definì le BBT sciöche n proiet che fajarà la storia dl injinieria.
Le suranstant dl govern talian, Matteo Renzi, à confermè tratan la vijita al cantier dl tunel de basa dl Prener – BBT da incö (05/07) che le govern respetarà i tëmps de costruziun dać dant. Le chef dl govern é gnü acompagné tratan la vijita dal Minister por les Infrastrotöres Maurizio Lupi, dal coordinadù dl proiet europeich dl TEN (Trans-European Networks) Pat Cox y dai trëi Presidënć dles Provinzies Arno Kompatscher, Ugo Rossi y Günther Platter. “Sciöche rapresentant dl govern talian oressi rengrazié” – chëstes les prömes parores de Renzi tratan la vijita – “dötes les porsones che colaborëia ala realisaziun dl’opera deache ara jarà ite tla storia dl teritore y dl’injinieria.” L’Europa mëss deventè n post d’incuntades y de comunanza de popui, cun prioritês sciöche la defenüda dl’ambiënt y le svilup tecnologich, insciö Renzi.
Tratan la vijita à le chef dl govern, Renzi, inće confermè (ala vijita êl inće presënć i ombolts di comuns interessà) da orëi tignì ite i tëmps de costruziun dl’opera: “Le govern assigurëia da tignì ite la dorada fata fora: nos ne orun nia jì sura le 2025 fora.”
Pat Cox, corrdinadù dl TEN, à recordè tratan so discurs che le proiet dl BBT é n’espresciun de na colaboraziun garatada danter l’Uniun Europeica, i Stać, les Regiuns y i Comuns. Al é inće stè le proiet cun le finanziamënt plü alt da pert dl’UE, insciö Cox, che à stlüt jö dijon: “Sun tl laûr da fa sö n’Europa nöia.”
Le chef dl govern Matteo Renzi à insciö stlüt jö süa vijita da incö (05/07) tl Südtirol, danmisdé él stè sön le program la partezipaziun al convëgn "Regiuns tl'Europa - Europa dles Regiuns" sön Ciastel Prösels a Fié adöm a danter l'ater le suranstant dl govern austriach Werner Faymann y al Presidënt dla Provinzia Arno Kompatscher.
De plü fotos dla vijita al BBT pon ciafè chilò:https://www.facebook.com/media/set/?set=a.669444916444139.1073741873.124810064240963&type=3&uploaded=4.
rc
