Atualità
Le Consëi por l’avalianza dles chances presentëia retrospetiva y prospetiva
L’ass.a provinziala Martha Stocker y la presidënta dl Consëi provinzial por l’avalianza dles chances Oberhammer à presentè ai 7 de lugio, a Balsan n program de diesc punć, l’ediziun nöia de „ëres“ y la relaziun d’ativité dal 2009 al 2013. „I ùn fat n gran vare inant por ći che reverda l’avalianza dles chances, inće por mirit dl laûr de coliamënt cun les organisaziuns y uniuns", à dit Stocker.
Le Consëi provinzial por l’avalianza dles chances à presentè na relaziun d’ativité dal 2009 al 2013 de passa 200 plates. „Nia ma la grandëza, mo inćë le contignü é straordinar“, à laldè Stocker. Ti agn che vëgn dess le Consëi laurè inant ti vedli ćiamps y dantadöt informè y sensibilisé sön l’avalianza dles chances, sciöche inće renforzè le coliamënt cun d’atres organisaziuns. Stocker s’à referì te chësc caje al dè provinzial dl‘ëra 2015 cun les politiches dl Tirol, olache ara dess dantaldöt nen jì dles sfidades tl raiun da paur.
Important por le laûr dl Consëi é inće stè aladô dl’assessuria provinziala dantadöt la lege sön l’avalivanza dles chances dl 2010, che à renforzè te tröc ćiamps i dërć dles ëres. La lege é gnüda scrita plücoater da Stocker.
Sides la presidënta dl Consëi Oberhammer che inće la vizepresidënta Franca Toffol à sotrissé, che le Consëi y l’Ofize dles ëres à laurè tröp y bun. „Y chësc nia ma tl Südtirol, mo inće sura i confins fora", à sotrissé Toffol.
„I sun dër contëntes che Martha Stocker à surantut danter sües competënzes l’avalianza dles chances y se dà da fà por nos, ajache ara é dessigü stada öna dles majeres sostignidësses dl Consëi ti ultimi agn”, à sotrissé Oberhammer.
Inće le diretur dla Repartiziun provinziala Laûr Helmuth Sinn à sotrissé che le laûr dl Consëi y dl Ofize dles ëres po se lascè odëi y à rengrazié dötes les colaboradësses y dötes les ëres dl Consëi. Garatè definësc Sinn l‘Equal Pay Day, le dè dl paiamënt iüst, i jorantins cun consëis sön la segurëza por mitans, che vëgn śëgn surantuć dal Trentin y che gnarà tosc fora sciöche app, sciöche inće le proiet Interreg „Frauen entscheiden" (Les ëres tol la dezijiun) sot la direziun de Astrid Pichler.
Ti agn passà à le Consëi ciafè tres manco scioldi, insciö Oberhammer. Dl 2009 n’àl ciafè 280.000 euro, y chësc ann ma plü 150.000 euro. „Porvia dles mosöres de sparagn n’à le Consëi y l’Ofize dles ëres dantadöt dl 2010 y 2011 nia podü adorè na gran pert di scioldi assegnà, insciö él stè dër ri da laurè; le fin plü important é porchël da podëi adorè daldöt i scioldi asssegnà por l’avalianza dles chances", à sotrissé Oberhammer.
Indöt tol ite le programm 10 punć, che l’Ofize dles ëres y le Consëi provinzial à laurè fora por i proscimi agn. Aladô de chisc ôres se dè jö ćiamò deplü por la compatibilité danter familia y laûr, la desfarënzia de paiamënt, la spartiziun dla ponsiun (convëgn de novëmber dl 2014), na miù imaja dl’ëra ti media y retlam, sciöche inće la realisaziun de n codesc di media, la cuota dles ëres, la usc de preferënza dopla, l’avalianza dles chances tl sport, la medejina de jëne (convëgn ai 10 d’otober dl 2014). Le Consëi y l’Ofize dles ëres ô se bate dantadöt cuntra la violënza sön les ëres, porchël vëgnel realisé la app: „Sicherheitstipps für Gitschn" (Consëis sön la segurëza por mitans) y i sterotips de jene tl eté da möt y danter jones y jogn. Implü él preodü l’introduziun de mëisc a tema.
Al é inće gnü presentè la brosciüra d’informaziun „ëres" cun tröpes informaziuns sön l’avalianza dles chances te tröc articui cun le conferimënt di „comoc d’or“, la valutaziun de retlam, sciöche inće tröc consëis de libri y intervistes interessantes. L‘ediziun da chësc iade é dedicada ala compatibilité danter familia y laûr. Te chësc numer ti va i „comoc d’or“ a „Erwin Demichiel", por la scomenciadia por de plü democrazia.
USP
