Atualità
Sbürles al’economia (1): L’IRAP gnarà arbassada – Antizipaziuns damanades
La Junta Provinziala à aprovè n program finanziar cun de plü mosöres finanziares por ti dè n impuls al’economia. Öna dles mosöres zentrales é la diminuziun dl’alicuota dl IRAP dal 2,88 porcënt al 2,78 porcënt. Intratan él inće gnü registré na gran domanda do les antizipaziuns sön le ressanamënt dla pröma ćiasa.
„Do cinch agn de crisa tl’Europa podunse odëi valch segnal de n pice mioramënt”, chësc à dit incö le Presidënt dla Provinzia Arno Kompatscher: “La Junta provinziala à tut la dezijiun da aprofité de chësta situaziun y da definì mosöres por ti dè na sbürla da plü perts al’economia”: da öna na pert ôra le fà cun alisiraziuns por zitadins y aziëndes, dal’atra pert cun investiziuns por l’infrastrotöra dla Provinzia y cun antizipaziuns sön les spëises por le ressanamënt dles prömes ćiases.
Por ći che reverda les alisiraziuns fiscales à la Junta provinziala inserì n passus tl dessëgn dla lege Omnibus cun chël che l’IRAP dess gnì arbassada: “Cun l’IRAP vëgnel ma metü sö cutes sön le laûr”, insciö Kompascher che à dit: “Sce nos aproun n smendrimënt de chësta cuta, ti dunse n sostëgn ales aziëndes y ales dites, por che ares toles sö plü porsones y chësc porta ala creaziun de plü posć de laûr.”
La mudaziun nöia prevëiga na diminuziun dl’alicuota dl IRAP da 2,88 porcënt a 2,78 porcënt. “Ćina le 2015 orunse rové al 2,68 porcënt”, insciö Kompatscher. L’alicuota dl’IRAP é gnüda arbassada dala junta nöia bele de 0,3 punć prozentuai, che à portè a na diminuziun de plü dl 10 porcënt.
N’atra sbürla al’economia é l’antizipaziun dl sostëgn finanziar por le ressanamënt de prömes ćiases, inće por sostignì le setur de costruziun. “Dal pröm de messè pol gnì fat domandes por n imprëst y ćina śëgn él bele gnü dè jö domandes por sura un n miliun de euro”, insciö Kompatscher. La gauja de n numer tan alt, tres aladô Kompatscher, podess ester deache les domandes po gnì fates por laûrs de ressanamënt che à metü man dal 1. de jenà inant. Sce les domandes dess superè i 12 miliuns che é preodüs, à Kompatscher confermè da orëi aumentè le finanziamënt a desposiziun: “Inće deache n superamënt dl limit preodü foss la demostraziun che la mosöra funzionëia y che al vëgn investì”, insciö Kompatscher.
rc
