Atualità
Sbürles al’economia (3): De plü investimënć por les operes publiches
La Junta provinziala sostëgn le mioramënt dla situaziun economica inće cun investimënć tl ćiamp dles infrastrotöres. Incö (ai 8 de messè) à la Junta provinziala aprovè le program por les operes publiches, na spëisa che prevëiga l’investimënt anual de 52 milinus de euro ćina le 2018. Implü él gnü definì les prioritês por la proteziun cuntra la tomada de peres.
Fabricać d’abitaziun, strades, operes publiches: la Provinzia investësc tles infrastrotöres, aumentëia insciö la cualité de vita y la competitivité dles aziëndes y ti dà de plü sbürles al’economia y al setur de costruziun. Le Presidënt dla Junta Arno Kompatscher à presentè incö la soma di investimënć preodüs: “Dl 2012 él gnü investì 249 miliuns de euro, tl 2013 ma 203 miliuns de euro por la costruziun de ćiases, la rëi stradala, operes publiches y infrastrotöres, tl 2014 gnaràl investì indöt 342 miliuns de euro”, insciö Kompatscher.
51,88 miliuns de euro gnarà investis tl 2014 tla costruziun de operes publiches. Le program cuincuenal dles operes publiches ćina le 2018, presentè incö dal assessur Christian Tommasini ala Junta, é gnü aprovè dala Junta provinziala cun n investimënt anual de 52 miliuns de euro ćina le 2018. “Por i proscimi agn unse arbassè por le momënt la spëisa al 80 porcënt di investimënć de 52 miliuns, mo chësc ma por avëi na toleranza economica por mosöres de prescia che podess deventè nezesciares tl dagnì”, à splighé Kompatscher che à dit, che sce al ne messarà gnì tut degönes mosöres de prescia gnaràl antizipé proieć preodüs tl program cun chi 20 porcënt che ne é nia gnüs inseris atualmënter (mo che é preodüs) tl program por la realisaziun de operes publiches.
Implü él gnü definì les prioritês por la proteziun cuntra la tomada de peres. “La lista é gnüda elaborada tres n conzet innovatif che vëgn inće adorè tla Svizra”, insciö Kompatscher.
rc
