Atualità
Sbürles al’economia (4): Critêrs nüs por le sostëgn al’urbanisaziun
Por l’urbanisaziun de zones industriales él preodü da śëgn inant indô la conzesciun de contribuć. Chësta dezijiun à tut incö (ai 8 de messè) la Junta provinziala, che à inće tl medemo tëmp stabilì i critêrs por l’assegnaziun dl sostëgn. Contribuć gnarà ma plü conzedüs por l’urbanisaziun primara dles zones, plü sostëgn él indere preodü por zones industriales innovatives o sura-comunales.
La Junta provinziala à tut la dezijiun incö da mët a jì indô le finanziamënt por l’urbanisaziun de zones industriales y à tl medemo tëmp inće stabilì les regoles por por l’assegnaziun dl sostëgn: “Contribuć é insciö ma preodüs por laûrs d’urbanisaziun primara sciöche strades, coliamënć o canalisaziuns”, à splighé incö le Presidënt dla Junta Arno Kompatscher tratan la conferënza stampa. Nia plü sostegnis cun n finanziamënt publich gnarà escavaziuns, colmamënć o la costruziun de mürs de sostëgn. “Chësc dess inće portè i comuns a chirì fora damì les zones da urbanisé”, insciö Kompatscher.
Contribuć plü alć é indere preodüs por zones industriales speziales. Por ejëmpl gnaràl conzedü contribuć plü alć por zones cun na gestiun suracomunala, sciöche inće por zones industriales inovatives, realisades cun n concurs de idees y che prevëiga por ejëmpl zones vërdes o che anüza l’energia te na manira dër efiziënta. Na promoziun plü ampla é inće preodüda por zones rurales.
rc
