Atualità
Mostra sön les costelaziuns dai 19 de messè inant tl Planetarium Südtirol
Les costelaziuns y sües posiziuns tl firmamënt: chësta é la tematica de na mostra che vëgn daurida en sabeda, ai 19 de messè, tl Planetarium Südtirol tla Val d’Ega. La storia y les conëscenzes astrologiches sön le monn mitologich dles stëres po gnì vijité debann ćina ai 24 de agost.
I sëgns dl liun, di jomelins y dl manz é ma trëi dles dodesc costelaziuns dl zodiach. Inće sce nia düć de nos n’é bugn da descurì les formes plü desvalies dles costelaziuns sön le firmamënt, él impò la maiù pert che conësc i inoms di sëgns zodiacai. Che à pa pordërt inventè chëstes costelaziuns y cara é pa süa posiziun tl firmamënt? Bele tl’antichité à les porsones osservè le firmamënt y adorâ figöres imaginares por descrì la posiziun dles stëres y inventô cunties y liëndes.
Le architët y grafich todësch Dietmar Lochner à dessegné a öre sön n tesciü de lin les dodesc costelaziuns dl zodiach. So möt, Lukas Lochner, à ajuntè ai dessëgns liëndes dla mitologia greca te na forma leterara saurida da capì.
Chëstes operes d’ert y de leteratöra é da odëi adöm cun material informatif sön l’astrologia y la mitologia greca da en sabeda, ai 19 de messè ćina en domënia, ai 24 de agost tl Planetarium Südtirol a S.Valentino (Gummer) tla Val d’Ega. L’entrada é debann.
Por de plü informaziuns:
Planetarium Südtirol,
Tel.: 0471 610020 (Mercui y domënia: 13.30-18.00, jöbia: 15.30-21.00, vëndres y sabeda: 14.30-21.00)
www.planetarium.bz.it/ - info@planetarium.bz.it
rc
