Atualità
"De Beles Desdrütes“: Mostra de fotografies da odëi al Museum Natöra
Les fotografies plënes de corusc dl fotograf american J Henry Fair pê te na pröma odlada composiziuns de ert astrata. Al é indere documentaziuns tristes dla desdrüta dla contrada y dl ambiënt. “De Beles Destrüdes” (Schöne Verwüstung) à inom la mostra che é da odëi tl Museum Natöra Südtirol a Balsan ćina ai 14 de setëmber.
Les documentaziuns fotografiches de J Henry Fair é tan tleres co beles: ares nes cunta les conseguënzes dla destrüda y dl incuinamënt ambiental tres les produziuns industriales y la chirida do materies prömes sciöche por ejëmpl de gran fleć de öre sön le mer, mudaziuns intieres dles contrades por gauja di resti dl’elaboraziun de metal y deserć de cënder por gauja dl’elaboraziun dl ćiarbun.
Da odëi él indöt 30 documentaziuns dal alt sura raiuns industriai dl USA, Canada, dl golf dl Messico, dla Spagna y di Paîsc Todësc. Por ejëmpl mostra öna döes fotografies les conseguënzes dla chirida do öre tl Canada cun la creaziun de te’ gran sfessöres tl terac cun na desćiaria de solper che porta a de gragn dagns por l’ambiënt. La gran destanza danter l’obietif fat jö y le fotograf à svilupé resultać de morvëia: les combinaziuns di corusc é beles y stërsces y forma n contrast cun le contignü dles fotografies. Chësc contrast danter belëza y desdrüta dl ambiënt à le fin da fà ponsè sura l’osservadù sön la relaziun danter la porsona y l’ambiënt: Co se comporta pa vignun ti confrunć dl ambiënt? Cares formes de reflesciun é pa l’ert buna da svilupé te chësc vers? Insciö él inće gnü ajuntè dlungia vigni fotografia de plü informaziuns sön i problems dl incuinamënt ambiental.
„Les documentaziuns de J Henry Fair nes mostra te na manira imponënta i dagns che la porsona à fat ala natöra. Le Museum Natöra oress oje l’atenziun sön i problems globai dla desdrüta y dl incuinamënt dl ambiënt y sön l’adoranza dles materies prömes da pert dles porsones”, à dit le diretur dl Museum Natöra Vito Zingerle che recorda, che la proteziun dl ambiënt dess tres gnì metüda en relaziun a n’economia sensibla y persistënta.
L’artist: J Henry Fair (nasciü a Charleston, South Carolina, USA) é n fotograf, ativist por l’ambiënt y le diretur dl’organisaziun cun fins ambientai „Wolf Conservation Center WCC“ tl South Salem (New Yor), che se bat por la proteziun dles laûrs. Sües operes fotografiches é gnüdes bele presentades tles trascmisciuns televisives plü desvalies sciöche TODAY Show, CNN, NPR's Marketplace, WDR Deutschland, y publicades te revistes internazionales sciöche le New York Times, National Geographic, Vanity Fair, Scientific American. J. Henry Fors laôra y vir a New York.
La mostra fotografica „De Beles Destrüdes“ é da odëi ćina ai 14 de setëmber tl Museum Natöra Südtirol, l’entrada costa 5 Euro (cun vijita inće al Museum), 3,7 euro arbassada, y 10 euro cun la cherta familia. Por mituns ćina i sis agn é l’entrada debann.
Le Museum é davert vigni dé, ater co le lönesc, dales 10 ales 18.
Por de plü informaziuns: Museum Natöra Südtirol, Strada Binder 1, Balsan (tel. 0471 412960) http://www.naturmuseum.it/
rc
