Atualità
Tratatives de reforma a Roma:„La nosta priorité é la tlausola de proteziun“
Por ći che reverda la reforma dla Costituziun cun la mudaziun dl Titul V y la repartiziun nöia dles competënzes danter le Stat y les istituziuns locales à la Provinzia de Balsan determiné sciöche la priorité plü alta l'assiguraziun dl mantignimënt dla tlausola de proteziun.
Le Presidënt dla Provinzia, Arno Kompatscher à referì ala Junta provinziala incö, mertesc ai 22 de messè, la situaziun sön les tratatives cun Roma y sön l’iter dles reformes costituzionales, dandaldöt por ći che reverda les reformes preodüdes dal Titul V dla Costituziun y la spartiziun nöia dles competënzes danter le Stat y les Regiuns. Le pröm obietif por la Provinzia de Balsan (adöm cun le Trentin), à dit Kompatscher, é chël da mantignì invariada la tlausola de proteziun che prevëiga che la reforma nöia ne ti vëgnes nia aplicada ales provinzies cun n statut d’autonomia y che n adatamënt dl statut d’autonomia é ma preodü en acordanza danter le Stat y les provinzies interessades.
Te n secundo momënt, canche la reforma costituzionala sarà jüda en forza y che por merit dla tlausola de proteziun ne podarà nia mudé l’autonomia dles provinzies cun n statut spezial, saràl spo le govern talian y la provinzia che tratarà les chestiuns por ći che reverda le svilup dl’autonomia: „Ćina śëgn à le govern mantignì sües impormetüdes, por le momënt él ćinamai preodü che nos essun dui rapresentanć tl Senat nü: na rapresentanza sura nostes aspetanzes“, à dit incö le Presidënt dla Provinzia, Arno Kompatscher, tratan la conferënza stampa do la sentada dla junta provinziala. Öna de nostes garanzies tratan les tratatives de reforma é inće la buna colaboraziun cun le secretêr dl Stat, Graziano Delrio, insciö Kompatscher.
rc
