Atualità
Proposta operativa Program FESR 2014-2020 pro Comisciun UE
La proposta operativa dl Program "Investimënć por la chersciüda y l'ocupaziun" dl Fonds europeich por le svilup regional FESR 2014-2020 por le raiun südtirolej ti é gnü ortié inant ala Comisciun europeica. Al é preodü investimënć por zirca 136 miliuns de euro.
Dlungia l'ajënda digitala, danter i obietifs tematics dl program, él la competitivité di sistems produtifs, la mobilité sostenibla de porsones y marćianzia, l'ocupaziun y l'intlujiun soziala, la inrescida, le svilup tecnologich y l'inovaziun, sciöche inće l'efiziënza energetica y les energies renovables sostignon la transiziun devers n'economia cun n’emisciun de anidrida de carbonium bassa.
Le Program Operatif FESR por la Provinzia de Balsan cun mosöres y obietifs adatà a livel local ê gnü definì do la presentaziun ai 22 april 2014 dl'Acordanza de Partenariat presentada dala Talia ala Comisciun Europeica; spo êl gnü sotmetü ala junta provinziala che l’à aprovè tla sentada di 8 de messè dl 2014. Śëgn ti spétel ala Comisciun Europeica da ejaminé le program operatif y dè jö eventualmënter osservaziuns ti proscimi trëi mëisc. Do l'intergraziun eventuala mësson aspetè l'aprovaziun definitiva da pert dla Comisciun europeica dl'Acordanza de Partenariat cun la Talia. Le program messass gnì aprovè te alplü sis mëisc da süa presentaziun.
L'Uniun Europeica contribuësc tres le Fonds europeich de svilup regional (FESR) al'implementaziun de sües strategies d'intervënt por sostignì na chersciüda inteliënta, sostenibla y intlusiva tres la coreziun dles desparitês regionales prinzipales esistëntes tl'Uniun. Le FESR é destinè a portè pro a smendrì la locia danter i livì de svilup dles regiuns y smendrì l’intardiada dles regiuns manco sostignides dantadöt por svantaji naturai o demografics, sciöche les regiuns transfrontalieres y de munt.
Por le tëmp de programaziun 2014-2020 él zirca 136 miliuns a desposiziun, le 50 % vëgn dal’UE tres le Fonds europeic por le svilup regional FESR, le 35 % dal Stat talian y le 15 % da fonds provinziai.
Le documënt é da ciafè sön le sit http://www.provincia.bz.it/europa/it/finanziamenti-ue/programmzeitraum-2014-2020.asp
USP
