Atualità
Misciun familia: L’assessuria Deeg à presentè i resultać
L’assessuria por la familia Waltrad Deeg à presentè incö (ai 4 de agost) tla scolina de St. Johann a Balsan i resultać dles incuntades cun i rapresentanć dles families te de plü posć dl Südtirol. Danter l’ater él gnü portè dant na relaziun sön la situaziun atuala dla politica familiara sciöche inće sön le laûr di proscimi mëisc.
„Mia ghiranza é stada chëra da ascutè sö i zitadins, da aldì cares che é sües propostes y sües ghiranzes tl setur dla familia y da avëi n barat d’idees scëmpl sön i bojëgns dles families“, insciö à splighé l’assessuria Waltraud Deeg le fin dla scomenciadia „les families tl dialogh“. „Dan da n ann é la lege de basa sön le sostëgn dles families jüda en forza y chësta sarà śëgn da implì cun mosöres y contignüs concreć. Cun chëstes incuntades ài orü odëi sce les mosöres arjunj so fin y olache al va debojëgn da fà coreziuns“, insciö l’assessuria Deeg.
Sön la basa dles incuntades él gnü a löm na seria de ghiranzes, che é gnüdes partides sö te dodesc seturs cun indöt 72 punć tematics. „En ligna de prinzip sunse sön le dërt tru“, s’à l’assessuria Deeg mostrè contënta di resultać, „l’orientamënt dla lege sön les families ti corespogn ai bojëgns dles perts interessades: la compatibilité familia – laûr, le sostëgn finanziar y le renforzamënt bunorì por les families“. Tratan les incuntades àn inće podü cöie adöm propostes concretes y nöies, sciöche an podess por ejëmpl portè i seturs dla sozietè y dles lerch vitales plü daimprò ales families.
„Les motivaziuns plü desvalies à daidé amplié nostes perspetives“, à dit l’assessuria. Tla maiù pert di seturs s’àl desmostrè che la direziun stimenëia y che le laûr po insciö jì inant. N ejëmpl concret é chilò l’istituziun dl’Agenzia dla Familia, che é nasciüda por merit dl dejidêr de na istituziun zentrala. Inće d’atres propostes portades dant po gnì realisades diretamënter. „Olache na realisaziun dirëta ne é nia poscibla saràl le Consëi por les families che portarà dant propostes de lege ala Junta provinziala“, à splighé l’assessuria Deeg che à ajuntè: „d’atres propostes gnarà inće dades inant ai Comuns y al Stat.“ „Por ejëmpl ti él insciö gnü fat al Minister por le Laûr Poletti propostes por l’otimisaziun dla dorada dl tëmp de paternité y maternité y por l’assiguraziun sön la ponsiun por ći che reverda le tëmp dl’educaziun a ćiasa“, deache „la familia é n’inćiaria che se müda cun le tëmp y che mëss gnì conzepida deboriada“.
„La familia tl dialogh“ é stada na seria d’incuntades dan les feries da d’isté danter l’assessuria por la familia y l’aministraziun, Waltraud Deeg y i rapresentanć dles families. Te cinch incuntades él insciö gnü debatü sön idees, impulsc, propostes y minunges sön la „familia“. Do les incuntades él gnü cherié n documënt partì sö te dodesc seturs cun indöt 72 tematiches. I seturs é: compatibilité familia – laûr, renforzamënt dla familia, sostëgn y assiguraziun sön la ponsiun por ći che reverda l’educaziun a ćiasa, sostëgn finanziar, la pert di peri, la rëi familiara y soziala, le volontariat, la politica dles abitaziuns, la familia y la scora, l’orientamënt amical devers dles families, le reconoscimënt sozial, la scemplificaziun dles prozedöres. Le documënt gnarà inće adorè sciöche basa programatica da pert dl’Agenzia dla Familia.
USP
Galaria dales fotografies
