Atualità
Acordanza por le reconescimënt abonora de dificoltês d’aprendimënt
L’assessuria por la sanité Martha Stocker y i assessurs por la formaziun Florian Mussner, Christian Tommasini y Philipp Achammer à firmé incö (13/03) por le pröm iade n’acordanza por le reconescimënt abonora de dificoltês d’aprendimënt de scolars y scolares. Tres chësta acordanza dessel gnì smendrì les dificoltês te scora y alisiré le sostëgn por la cura danter le sistem sanitar y scolastich.
„Problematiches d’aprendimënt sciöche inće dificoltês da scrì, da lì y da fà cunć é en aumënt costant tl Südtirol“, à splighé l’assessuria Martha Stocker incö en gaujiun dla firma sön l’acordanza, la pröma de chësc vers tl Südtirol, danter la Repartiziun Sanité y les trëi Intendënzes scolastiches y che reverda l’atuaziun dles diretives por le dërt al stüde y al’istruziun de scolars cun dificoltês spezifiches d’aprendimënt. Tl raiun soziosanitar de Balsan – olache al vëgn curé zirca le 75 porcënt di caji de mituns y jogn cun dificoltês d’aprendimënt – é le numer de mituns en cura aumentè dal 2010/11 cun 372 a 582 tl ann scolastich 2013/2014. Dötadöm él gnü metü a jì l’ann passè n’assistënza por 1108 scolars y scolares tl Südtirol.
L’assessur por la scora ladina Florian Mussner à recordè che „tles scores ladines é le numer complessif de düć i scolars nia tan alt, mo le numer de caji de mituns y les mitans tocà da dificoltês d’aprendimënt fej fora zirca le 4,32 porcënt. De conseguënza él dër important da ativé, adöm ales families, mosöres de reconoscimënt, sostëgn y prevenziun prezises le plü atira che ara va.“ Dal 2011 al 2013 él gnü tignì n curs de formaziun aposta tl’Université de Porsenù, a chël che 25 di 327 insegnanć dla scora ladina a tut pert y che insciö ne é nia ma spezialisà tl reconescimënt y dla cura abonora, mo inće na fontana d’informaziun importanta por düć i atri insegnanć tles scores, à sotligné l’assessur Mussner.
L’assessuria Martha Stocker à recordè che „por i mituns tocà él imporant, che les dificoltês vëgnes reconesciüdes abonora por gnì curades tla dërta manira.“ Cun le protocol d’acordanza vëgnel atuè les normes iuridiches dl Stat y regolamentè i prozedimënć cun les trëi Intendënzes y la Repartiziun Sanité. „I sun sigüda che chësta colaboraziun é öna dles plü importantes che i sun stà bugn da mët sö ti ultims agn, dilan porchël a düć i colaboradus dl grup de laûr danter la Repartiziun Sanité y les istituziuns de formaziun“, insciö Stocker. Inće i assessurs Christian Tommasini y Philipp Achammer à sotligné l’importanza dl’acordanza. „Al mëss ester öna dles prioritês dl sistem de formaziun da daidé scolars cun dificoltês y da curì les manćianzes – inće bele dan la diagnosa“, à dit Achammer. „Cun chësta acordanza vëgnel renforzè la rëi danter la scora y le sistem sanitar, chësc va dantadöt a bëgn di mituns“, à recordè l’assessur Tommasini.
L’acordanza prevëiga che les Intendënzes, en colaboraziun cun les scolines y cun les scores elementares, mëtes sö diretives prezises por le reconescimënt preventif de dificoltês d’aprendimënt o de svilup. Tres na rëi de barat d’informaziuns dessel te n secundo momënt gnì inrescì dala scora y dales scolines faturs de risch y mosöres didatiches spezifiches de prevenziun y analisa. Sce al ne dess nia gnì arjunt i resultać preodüs dala scora spo él le Consëi dla tlassa y la direziun, cun le consëns di geniturs, che po fà na domanda d’analisa al sorvisc sanitar.
Le sorvisc sanitar arà daldô la responsabilité da mët a jí na analisa do standarg definis por stabilì n’acordanza te cört tëmp cun i sorvisc de reabilitaziun por na cura terapeutica di mituns tocà. La colaboraziun danter les scores y le sorvisc sanitar reverda implü la chirida, la cerna y le svilup de stromënć adatà por n reconescimënt abonora y por la continuaziun dla colaboraziun te plü grups de laûr. Na seziun aposta dl’Intendënza ladina se crüzia de chëstes problematiches cun personal spezialisé, le Sorvisc por la consulënza psicopedagogica y l’integraziun, cun l’ispeturia Carla Comploj y les colaboradësses Irene Costa y Sabine Hofer (telefonn: 0471 41 70 12, sënta tla strada Binder nr.29, Balsan)
rc
