Atualità
Sepa, Zënter de documentaziun y Zorzi: i temesc dl mëis dl’Euregio
L’area unica por i paiamënc te euro (SEPA), le percurs d’informaziun sot al Monumënt ala Vitoria a Balsan y le professur trentin Giuseppe Zorzi: chisc é i temesc dl mëis presënc, te na forma multimediala, sön la homepage dl’Euregio sot ala misciun: www.europaregion.info.
Vigni mëis él l’Euregio che informëia sön süa homepage sön na personalité, n lüch interessant y na chestiun iuridica atuala che reverda le raiun danter Desproch y Trënt. Sciöche porsona da presenté por le mëis d’aurí él gnü chirí fora Giuseppe Zorzi, le diretur dla Fondaziun Alcide De Gasperi da Trënt. Zorzi é ince n professur particolar por ci che reverda l’aspet dl’Euroregiun: le lönesc y la sabeda tëgnel ores d’insegnamënt de storia y filosofia tl lizeum tlassich „Prati“ a Trënt, tratan l’edema insëgnel te n lizeum a Desproch. Por lí do plü avisa süa storia: www.europaregion.info/it/giuseppe-zorzi.asp
La tematica iuridica dl mëis, presentada te na forma multimediala, trata dl SEPA, l’area unica por i paiamënc en euro, ativa dal 1 de agost dl 2014. Te chësc raiun él i zitadins, les imprejes, les aministraziuns publiches y atri operadus economics che pó efetué y ciafé paiamënc te euro, sides al’intern di confins nazionai co ince danter i paisc che nen fej pert, do les condiziuns de lege, di dërc y dles oblianzes. Informaziuns y spligaziuns plü avisa él Paolo Guerriero che dá, n espert dl Zënter por la sconanza di consumadus: www.europaregion.info/it/sepa---einheitlicher-euro-zahlungsverkehrsraum.asp
Le lüch dl mëis d’aurí é indere le Zënter de documentaziun storica inauguré tl mëis de messé dl 2014 sot al Monumënt dla Vitoria a Balsan, n percurs d’esposiziun che cunta dla perioda storica danter le 1918 cina l’ann 1945 tolon en conscidraziun i avenimënc locai y internazionai, cun n’atenziun particolara ales ditatöres dl fascism y dl nazism. Plü informaziuns él da ciafé: www.europaregion.info/it/bz-18--45-ein-denkmal---eine-stadt---zwei-diktaturen.asp
rc
Galaria dales fotografies
