Atualità
Val de Puster y Val Badia: Manutenziun straordinara dles strades 2015
Le Sorvisc Strades dla Val de Puster metará man te püch cun la manutenziun straordinara dles strades. Por i intervënc sön les strades provinziales vëgnel metü a desposiziun 1,29 miliuns de euro, por les strades statales indöt 1,68 miliuns de euro. „Cun i laurs de manutenziun y metüda en segurëza orunse ti pité ai zitadins strades plü sigüdes“, dij l’assessur Florian Mussner.
„La manutenziun dles strades vëgn metüda da jí tres n program de priorités che é gnüs stabilides aladô de na ligna de criters tlers“, sotlignëia l’assessur por la manutenziun dles strades Florian Mussner. La gran pert di laurs reverda ince chësc ann l’asfaltaziun dles strades.
Por le raiun dla Val de Puster y dla Val Badia él preodü na seria de laurs d’asfaltaziun, danter l’ater por ći che reverda les strades provinziales dla Val de Puster (488.000) euro y dl’Alta Val Badia (122.000 euro). Cun 244.000 euro vëgnel ressané y recostruí na pert di mürs de proteziun sön la strada provinziala da San Martin de Tor tla direziun de Longiarü. 122.000 euro é indere preodüs por la ressanamënt di mürs de sostëgn y di tlandri dles strades provinziales dal Ju de Furcia tla Comun de Valdaora. Por ressanamënc dla strada sön les strades provinziales dla Val de Puster él preodü na spëisa de 244.000 de euro. Por la metüda en segurëza de parëis dla strada provinziala tl Comun de Türesc en direziun de Rein vëgnel metü a desosiziun 50.000 euro.
Por ci che reverda les strades statales dla Val de Puster y dla Val Badia él preodü laurs por la metüda en segurëza di parëis dlungia la strada statala dla Val Badia ti Comuns de Mareo y de San Martin de Tor por indöt 244.000 euro. Por atri pici laurs de metüda en segurëza di parëis y por la manutenziun dles operes de segurëza dla strada él preodü na spëisa de 20.000 euro.Implü gnarál investí 244.000 euro por la metüda en segurëza cuntra la tomada de peres dla strada statala dla Val de Türesc.
Laurs de manutenziun di tlandri y di mürs de sostëgn dla strada sön les strades statales gnará efetuá danter l’ater ince a Corvara y a Valdaora. Por le ressanamënt di mürs y di tlandri dla strada statala sön le Jú de Frara tl Comun de Corvara él preodü 244.000 euro, implü gnarál investí la medema soma por pici laurs de manutenziun por la metüda en segurëza dla strada statala dla Val Badia y dla strada statala sön le Ju de Frara.
Por laurs d’asfaltaziun dles strades statales tla Val de Türesc vëgnel metü a desposiziun 135.420 euro, tla Alta Val de Puster 244.000 euro. Implü él preodü na spëisa de 207.400 euro por le ressanamënt de mürs de sostëgn dlungia la strada statala dla Val de Puster a Valdaora.
Prësc dötes les inciaries che revera i laurs de mautenziun dl Sorvisc strades vëgn surandades, tl respet dles normes y dles leges varëntes te chësc setur, a dites y imprejes locales, insciö l’assessur Mussner y sotlignëia che „tl 2014 é prësc düc i laurs gnüs assegná a imprejes locales y i sun sigü che an podará garantí le medemo ince por chësc ann.“
rc
