Atualità
Tlausöra Junta: 45 miliuns por scores y frabicac publics
La Junta provinziala mët a desposiziun por le 2015 indöt 45 miliuns de euro por la costruziun de frabicac nüs. I programs d’intervënt é gnüs aprová incö (27 de merz) tla sentada de tlausöra dla Junta sön proposta dl’assessur Christian Tommasini. Por le momënt vëgnel lauré sön 59 frabicac nüs, la priorité reverda les scores.
La Repartiziun Laurs publics á en gestiun por le momënt 59 cantiers, por atri 38 laurs él bele gnü stlüt jö i contrac y por 43 intervënc él gnü realisé i proiec de costruziun. „Cun n’adoranza mirada dles ressurses y cun le mantignimënt di tëmps de costruziun preodüs orunse mioré la cualité de vita dla popoliaziun por dé ince n segnal tler al’economia locala", á splighé incö l’assessur Tommasini che á injunté che implü él un di obietifs dla Junta chël da cherié posć de laur nüs y da modernisé les infrastrotöres publiches te döt le Südtirol.“
Sön la basa dl program aprové incö dala Junta te süa secunda tlausöra dl ann á l’assessur por le frabiché Christian Tommasini presenté i laurs prinzipai: a Balsan él sön le program l’ampliamënt dla scora profescionala „Luigi Einaudi“, la sënta destacada dl’istitut scolastich „Heinrich Kunder“, la costruziun de na palestra y de n garaje al lizeum „Walther von der Vogelweide“. Implü él sön le program la costruziun dla sënta nöia por les forzes de socurs a Maran, le ressanamënt energetich dl zënter dles scores altes a Bornech, la demoliziun y recostruziun dla ütia de munt Vittorio Veneto y Punt de dlacia, la recuperda dl areal „Stadelhof“ a Pfatten y l’ampliamënt dl Infopoint dl BBT a Franzensfeste.
Pro i intervënc, olache al é bele gnü fat contrac y convernziuns él da compedé sö: l’atuaziun dles prömes acordanzes danter Stat y Provinzia por la costruziun de infrastrotöres militares (cun le barat de arees nia plü adorades dal militer) y dl zënter dles biblioteches nü a Balsan. Danter i proiec cun n finanziamënt assiguré él gnü inserí la recostruziun dla ütia de munt Petrarca (Stettiner Hütte), la realisaziun de n percurs por les rodes a Laives y la restrotoraziun y l’ampliamënt dl zënter scolastich talian a Sterzing. Por la fin dl’ann gnarál ince scrit fora les bandides de concurs por de plü intervënc, danter l’ater le ressanamënt dla scora por geometers „Peter Anich“ a Balsan, la recostruziun dla ütia da munt „Palla biana“ (Weißkugelhütte) y le secundo lot dl cantier provinzial a Lana.
rc
