Atualità
Descurí les Dolomites patrimone Unesco cun Google Trekker
Da incö (27 de merz) sarál poscibl da descurí les arees dles Dolomites patrimone mondial dl Uneso diretamënter da ciasa cun n iade virtual sön Street View de Google Maps. „La Fondaziun Unesco é la pröma istituziun dla Talia che pó s’anuzé dl Trekker Loan Program de Google“, sotlignëia l’assessur Richard Theiner, presidënt dla Fondaziun Dolomites Unesco.
Da mëisc laora l’Ofize Parcs naturai adöm cun la Fondaziun Dolomites Unesco por scomencé na colaboraziun cun Google. Sëgn é l’obietif gnü arjunt: la Fondaziun Unesco é la pröma istituziun dla Talia che fej pert dl Trekker Loan Program de Google. „Chësc program ti pita ales organisaziuns turistiches, a ënc no profit, istituziuns d’inrescida y universités la poscibilité da adoré le program por planifiché gites y percursc“, spliga Renato Sascor dl’Ofize Parcs naturai.
Ti parcs naturai dl Südtirol é les registraziuns gnüdes realisades dal Ofize Parcs naturai cun n rucsoch de Google Trekker (cun 15 aparac da fá jö) sön percursc y trus conesciüs. „Düc chi che va ion sö por munt po da sëgn inant descurí bele diretamëntrer da ciasa tröc percursc dales Dolomites dl Nord, cina chëres dl grup dl Brenta y les Dolomites dl Friul“, á prezisé Sascor.
Contënt dl operaziun garatada é l’assessur Richard Theiner, presidënt dla Fondaziun Dolomites Unesco. „L’interes de n operadú mediatich tan gran sciöche Google sotlignëia ciamó de plü le flair y la belëza dles Dolomites. Mesi de comunicaziun sciöche Google Street Views ampliëia la conescënza de nosc paeseaje che po insciö gní amiré ince dai turisc da ciasa. Sëgn sunse ince nos damaná, da ciafé le dërt trú por mantigní y traté te na manira sensibla nosc patrimone prezius che nes é gnü scinché.“
L’area dles Dolomites é gnüda detlarada patrimone UNESCO tl 2009 y á na spersa de indöt 142.000 hectar, partis sö sön cin’ Provinzies: Belun, Balsan, Pordenone, Trënt y Udine. Chësc paesaje unich y de morvëia po sëgn gní conscidré da düc tres Google Street View. Danter les munts da odëi él ince l’area de Puez-Odles, e Scilier, le Ciadenac, le Latemar, le Bletterbach de Aldein y le grup dles Dolomites dl Brenta.
rc
