Atualità
Ass.a Stocker sön le Dé internazional dl’autism: „Mioré la cualité de vita“
Te Südtirol él söporjö 200 jogn che mëss se confronté cun desturbs che reverda l’autism. L’assessuria por la sanité Martha Stocker sotlignëia en gaujiun dl Dé internazional dl’Autism, indoman ai 2 de aurí, l’esigënza da sostigní y daidé i mituns, jogn, adulc y sües families pro les sfidades cuotidianes.
L’autism condizionëia les capazites soziales y comunicatives dles porsones che nen sofrësc y á gonot sciöche conseguënza n comportamënt de morvëia y de repetiziuns. Le desturb d’autism comporta na mancianza tla comunicaziun (sides tl baié co tl lingaz nia baié) y tles competënzes soziales (capazité d’interaziun y d’integraziun cun atri), cun na presënza de ativites, interesc y comportamënc limitada. Tl’Uniun Europeica él indöt 3,3 miliuns de porsones che mëss se confronté cun les dificoltes dl autism. L’interés dles porsones cun autism reverda gonot ma valgügn aspec dla vita, te chi che deperpo sües capazites é dër altes, por ejëmpl da dessigné, da fá cunc, da se recordé cosses y avenimënc y pro la musiga. Sciöche la ressoluziun dles Naziuns Unides sotlignëia é le reconescimënt preventif, la promoziun individuala y na cura spezialisada la fondamënta prinzipala por ti garantí ai mituns, jogn y ales families na buna cualité dla vita.„Al é nosc dovëi da sostigní les porsones che sofrësc de autism y sües families“, sotlignëia l’assessuria Stocker. Tl ann passé él gnü inrescí dal’Aziënda sanitara dl Südtirol la situaziun locala por capí cai che é i bojëgns dles families interessandes por mët da jí spo i pröms vari. Öna dles gran sfidades por le dagní resta la chirida de n post de laur: „Nosc compit é chël da lauré tla direziun de mëte les porsones te na situaziun de autonomia y da mioré insciö süa cualité de vita sciöche ince chëra de sües families“, stlüj jö l’assessuria.
rc
