Atualità
Conferënza „Ëres informades“ : Les dates por le mëis de aurí
La Comisciun provinziala por l’avalianza dles oportunites y le Sorvisc Ëres mët a jí tl mëis de aurí na seria de conferënzes dal titul „Ëres informades“ en colaboraziun cun i Comuns y les organisaziuns locales. La pröma manifestaziun dl mëis é na conferënza sön co condüje n discurs de suzes ai 9 de aurí a Eppan.
La seria de conferënzes, che fej pert dl’ativité d’informaziuns y de ajornamënt dla Comisciun provinziala por l’avalianza dles oportunites y dl Sorvisc Ëres dla Provinzia, é partida sö sön döt le raiun dl Südtirol. L’obietif é chël da arjunj le numer plü alt de ëres dl Südtirol por ti dé informaziuns importantes sön tematiches atuales.
Les conferënzes sará dër desvalies öna dal’atra. I temesc reverda danter l’ater chestiuns legales importantes por les ëres, la sanité, le coraje zivil, la familia, le laur y l’imaja dl’ëra tla sozieté. Les reladësses é porsones espertes te chisc seturs, che é bunes da trasmët pasciuns, idees y contignüs y che é desponibles por respogn ales domandes che vëgn fates dales porsones presëntes. L’ingres ales manifestaziuns é debann por dötes les porsones interessades.
La pröma manifestaziun dl mëis é ai 9 de aurí dales 20 tla sënta dla biblioteca de San Michael/Eppan, olache la consulënta Sabine Fischer presentará les fondamëntes por mët adöm n discurs de suzes por porté les porsones che ascuta da süa pert cun argomënc de valüta. Sabine Fischer tignará ince na conferënza ai 15 de aurí dales 20.00 tla biblioteca de Montan, te chëra che ara dará consëis sön co aumenté l’autostima por avëi suzes ti ciamps plü desvalies dla vita. Ai 17 de aurí sará Sabine Fischer dales 19.30 tl salf cultural a St.Gertraud/Ulten por dé na suraodüda sön les sfidades desvalies de n’ëra tla vita privata, te familia y pro le laur.
La publizista Astrid Schönweger y la mediatëssa culturala Irene Hager von Strobele presentará tratan döes sëres d’informaziun, ai 15 de aurí dales 20.00 tla Biblioteca de Klobenstein y ai 22 de aurí dales 19.30 tla Biblioteca de Niederrasen, n valgügn aspec che reverda le monn dles erbes dal titul „Südtiroler Kräuterfrauen – ihr Leben, ihr Heilwissen, ihre Rezepte“. La medejina naturala y l’omeopatia sará les tematiches zentrales dla relaziun de Kathrin Fischer, spezialisada de medejina complementara, ai 22 de aurí dales 20 tl salf di seminars tl Zënter zivich de San Martin de Passeier.
Plü informaziuns sön la seria de manifestaziuns pon lí do sot ala misciun: http://www.provinz.bz.it/chancengleichheit/service/vortragsreihe-informierte-frauen.asp
USP
