Atualità
102 maestri dai schi nüs: Le presidënt Kompatscher ti á surandé i diploms
63 maestri de schi, sis maestri de paslunch, 22 maestri spezialisá tl telemarch y 11 maestri de snowboard é gnüs premiá incö (9 de aurí) a Balsan dal presidënt dla Provinzia Arno Kompatscher. Indöt gnarál lapró 102 maestri nüs y maestres nöies, i diploms ti é gnüs surandá incö tratan la fiera „Pro Winter“ a Balsan.
Te Südtirol cumpedunse por le momënt 59 scores de schi cun indöt 2.000 maestri dai schi. „Les maestres y i maestri de schi é nüsc ambasciadus dl turism da d’invern. Ai ti pita a nüsc ghesć n acompagnamënt professional tratan süa perioda de vacanza te nüsc raiuns. La formaziun por deventé maester de schi vëgn finanziada dala Provinzia y assigurëia insciö standarg de cualité alc“, á dit le presidënt dla Provinzia Arno Kompatscher incö tratan la zerimonia de premiaziun ala fiera "Pro Winter" a Balsan. Adöm al presidënt dl Ordin dles profesciuns di maestri dai schi, Claudio Zorzi ti á le Presidënt dla Provinzia surandé i diploms ai maestri de schi nüs.
L’abilitaziun da eserzité la profesciun da maester de schi á ciafé chësc ann 63 maestri de schi alpin, implü vëgnel lapró sis maestri de paslunch y 11 maestri de snowboard. Da cumpedé lapró él chësc ann 22 maestri nüs de telemarch, 11 maestri de schi nüs cun diploms spezialisá, 11 por l’insegnamënt da jí cui schi por mituns y 9 maestri de schi cun na spezialisaziun tl freeride.
I maestri de schi nüs mëss passé de plü ejams de teoria, de didatica y de pratica tratan süa formaziun. Öna dles dificoltés plü granes reverda bele les proes de seleziun, olache al vëgn chirí fora i maestri dai schi cun les capazités plü altes. Dui pilastri dl’educaziun reverda ince la segurëza sön pista y la conescënza di lingac, dantadöt dl talian y dl todësch, mo ince dl inglesc y dl rusc.
„Les scores dai schi s’á svilupé cul tëmp a aziëndes de sorvisc modernes. Les ghiranzes ai maestri di schi é dër altes, insciö ne vëgnel nia ma plü damané competënzes tecniches y fisiches, mo ince soziales y didatiches. Ma n’educaziun ezelënta é la garanzia che les scores dai schi restará ince tl dagní n fautur important por la posiziun dl Südtirol sciöche destinaziun turistica da d’invern de pröm livel“, á stlüt jö le presidënt dla Provinzia Arno Kompatscher.
USP
