Atualità
Equal Pay Day 2015: „Plü avalianza pro i laurs te familia“
Le Consëi provinzial por l’avalianza dles oportunités y l’Ofize dles Ëres á presenté incö, mercui 15 de aurí les aziuns preodüdes por l’Equal Pay Day dl 2015 cun le moto „Le laur te familia ne vëgn nia paié“. La majera aziun sará le concurs da soperscé por ëi dla politica, dl sport y dl’economia ai 17 de aurí dales 13 tla plaza Muser a Balsan.
„Le laur te familia ne vëgn nia paié“: chësc é le moto dl Equal Pay Day da inann cun le focus sön les dificoltés de compatibilité dla familia cun le laur sciöche öna dles gaujes prinzipales dla desfarënzia de paiamënt de mesamënter 17 porcënt danter ëi y ëres. „Vigni dé fej les ëres n gröm de ores nia paiades te ciasa y surantol tres ciamó la maiú pert di laurs de ciasa che ne vëgn nia paiá. Insciö é la despartiziun dles perts danter ël y ëra ince te Südtirol tres ciamó caraterisada da mustri tradizionai. Chësta despartiziun iniüsta te ciasa á conseguënzes negatives sön les poscibilités de laur dles ëres y se tira para n mënder davagn y na ponsiun plü bassa“, á sotligné l’assessuria por l’avalianza dles oportunités Martha Stocker tratan n’incuntada cun i media incö, mercui ai 17 de aurí a Balsan.
Porchël mët le Consëi provinzial por l’avalianza dles oportunités y l’Ofize Ëres da jí de plü aziuns che dess cherié na cosciënza por chësc argomënt important y daidé les ëres da partí sö anfat i laurs te ciasa, l’assistënza di mituns, le guern a parenté y atres situaziuns danter ël y ëra.
Ulrike Oberhammer, presidënta dl Consëi provinzial por l’avalianza dles oportunités, á sotligné l’importanza da porté a na contlujiun la divijiun tradizionala di rodi tla sozieté y da cherié na manira nöia dl ponsé. „Ince i ëi dess daidé tl laur de ciasa y pro l’educaziun di mituns, se tolon na perioda de paternité. I püc che s’á anuzé de chësta poscibilité vëgn odüs sciöche ejemplars esotics, mo les mudaziuns mët man te nosc ponsé. I ti surandun ion a nüsc ëi y oms mez dl laur te ciasa y pro l’educaziun di mituns. Na mudaziun te chësc vers é dessigü n vantaje por düc i mëmbri dla familia.“
La vizepresidënta Franca Toffol á analisé te so intervënt le laur nia paié tles families y i dac che é gnüs publicá sön chësta chestiun dal ISTAT y che reverda l’ocupaziun feminina y les nasciüdes. „Te forá dl 2015 él gnü registré 42.000 posc te laur demanco, le numer dles nasciüdes é jü zoruch da 9,8 por 1000 abitanc tl ann 2008 a 8,5 tl ann 2013“, insciö Toffol. Chisc dac nes mostra sö che al é ciamó tröp da laur ti seturs dl’economia, dles politiches soziales y culturales, dij Toffol y stlüj jö: „Le laur dles ëres – paié y nia paié – mëss gní reconescü de plü tla sozieté.“
Silvia Vogliotti dl Istitut por la promoziun dl laur AFI á sotligné te so referat che „i dac dl EUROSTAT nes confermëia che les ëres talianes fej, en raport a düc i atri Stac europeics, la plü gran cuantité de laur nia paié. Cun 5 ores y 20 menüc al dé laora les ëres talianes 100 menüc debann de plü co les ëres tla Scandinavia, che vëgn daidades de plü da sü ëi.“
L’assessuria por les families Waltraud Deeg á sotligné che „la dezijiun di ëi da se tó tëmp lëde dal laur por la paternité é gonot ince na domanda dles finanzes y che vëgn ince condizionades dala desfarënzia de davagn danter les ëres y i ëi.“ Les conseguënzes de na paternité é plü altes, sce le davagn pro le laur é alt, recorda Deeg. Te n stüde dl’ASTAT sön i ëi tl 2012 á 12,6 porcënt di ëi dít che ai ne tol nia tëmp lëde por la paternité por gaujia de na pordüda dl davagn plü alta en confrunt dla pordüda dl davagn dl’ëra. „Nosc impëgn vá tla direziun de na sovenziun publica di paiamënc tl’economia privata por che trami dui i geniturs pois se tó le tëmp lëde zënza desfarënzies“, insciö l’assessuria por la familia.
Por alzé fora chësta desbalanza vëgnel partí fora ai 17 d’aurí danmisdé sura döt Südtirol pro portines desvalies material informatif a Auer, Balsan (5), Branzoll, Porsenú (3), Bornech, Eppan, Girlan, Tlüses, Lana, Leifers, Margreid, Maran (5), Neumarkt, Salurn, Sarnthein, St. Crestina, St. Pauls y Tramin. Ince a Balsan sarál plü o manco dales 10.00 ales 13.00 na portina d’informaziun sön le Musterplatz, olache la presidënta dl consëi provinzial por l’avalianza dles oportunitês Ulrike Oberhammer adöm cun de plü rapresentantes dl consëi y de d’atres organisaziuns por les ëres informará sön la desbalanza danter i ëi y les ëres. Un di highlights dl Equal Pay Day sará le contest da soperscé de ëi, le 1. „Ironman Contest“ de Balsan dales 13:00 sön le Musterplatz cun, danter l’ater, partezipanc dal monn dla politica, dl sport y dl’economia. Al tolará pert le vize-presidënt dla Provinzia Christian Tommasini, l’assessur provinzial Philipp Achammer y le assessur regional Sepp Noggler, l’obmann dla Lia di Paurs Leo Tiefenthaler, le presidënt dl LVH Gert Lanz, le presidënt dl Uniun di Osć y Ostis Manfred Pinzger y le snowboarder Hannes Fischnaller.
De plü informaziuns él sot a: http://www.provinz.bz.it/chancengleichheit/themen/594.asp sciöche ince sön la plata facebook https://www.facebook.com/chancengleichheit.pariopportunita. Sce I ëis domandes podëise contatede diretamënter l’Ofize dles Ëres: Strada Dante 11, 39100 Balsan, tel. 0471/416950.
Les organisaziuns che fej para é (tla verjiun todëscia):
SVP-Frauenbewegung, Dachverband der kulturellen Frauenverbände, KVW-Frauen, UIL-SGK, Katholische Frauenbewegung, W-net-networking women, Frauen helfen Frauen Bozen, Grüne Frauen, Südtiroler Bäuerinnenorganisation, Frauen gegen Gewalt - Frauenhaus Meran, Plattform für Alleinerziehende, Alchemilla, Frauenstammtisch Gröden - Meisa turonda, Gleichstellungsrätin, L´Alto Adige nel cuore, Netzwerk Frauen-Arbeit, CGIL/AGB, Katholischer Familienverband Südtirol, Kommissionen und Komitees für Chancengleichheit der Gemeinden Bozen, Brixen, Klausen, Leifers, Kaltern, Auer, Neumarkt, Tramin, Sarntal, Margreid, Meran, Bruneck, Eppan, Prad, Frauenwerkstätte - HDS, Demokratische Partei, Donne Nissà, Frauenmuseum Meran, Frauenarchiv Bozen, AFI/IPL, BPW-Fidapa, Frauengruppe Lana, Cf Südtirol, Beirat für Chancengleichheit der Freien Universität Bozen, Pensplan, SGB-CISL, Handelskammer Bozen - Beirat für die Förderung des weiblichen Unternehmertums, ASGB, Jugendring Südtirol, Tagesmutterverein, Allianz für Familie, Caritas, Jugendzentrum Westcoast Kurtinig - Margreid - Kurtatsch, Rechtsanwaltskammer Bozen – Komitee für Chancengleichheit, Südtiroler Sanitätsbetrieb – Einheitliches Garantiekomitee für Chancengleichheit, die Aufwertung des Wohlbefindens der Bediensteten und gegen die Diskriminierungen, Verein EsIstZeit, Frauen helfen Frauen Meran, Italienischer Blinden- und Sehbehindertenverband Onlus Landesgruppe Südtirol, FIT SGBCISL – Frauenbewegung der Fachgewerkschaft im Transportwesen, Bildungsausschuss Branzoll, Architekturstiftung Südtirol.
rc
