Atualità

Scora / Cultura | 20.04.2015 | 15:13

La politica és tö! Scomenciadia: „Before I die, I’d like to…“

Sté chic n momënt y ponsé do a ci che é veramënter important tla vita – chësc é l’impuls che la scomenciadia „Before i die, i’d like to…“ ti ô dé ai jogn y che é gnüda presentada incö, lönesc ai 20 de aurí, a Balsan tl contest di Dis d’aziun de Formaziun politica 2015. Les aziuns sará despartides sö sön döta la Provinzia, dai 23 de aurí ince tles valades ladines.

Tröc zitadins de Balsan á fát para incö, lönesc ai 20 de aurí, al’incuntada de presentaziun dl'aziun „Before I die, I’d like to…“ che fej pert dla seria de scomenciadies metüdes da jí tl contest di Dis d’aziun de Formaziun politica 2015 che á sciöche fin prinzipal chël da motivé la jonëza da se dé jö cun tematiches che reverda la politica y l’interaziun cun la politica. L’aziun „Before I die, I’d like to…“ (Denanche morí, oressi…) vëgn organisada dal Ofize Formaziun permanënta dla Cultura todëscia adöm ai Sorvisc de formaziun dla provinzia te 12 plazes publiches te döt Südtirol. I Consëis de Formaziun dles valades ladines fej para cun na tofla dai 23 de aurí ai 09 de má tla plaza de S.Antone en cooperaziun cun la Lia Mostra d’ert da Urtijëi y dai 23 d’aurí ai 16 de má tla plaza de Ciastel Tor a San Martin en cooperaziun cun le Museum Ladin.

L’assessur por la cultura todëscia Philipp Achammer á presenté incö (20 de aurí) l'aziun preodüda sön le Kornplatz a Balsan y che gnará tignida dai 23 de aurí cina ai 9 de má. „Öna dles mies aodanzes é chëra che i sun bugn da motivé i jogn da inrescí plü gonot y plü a funz les domandes prinzipales dla vita che reverda nosta esistënza“, insciö Achammer, che á definí l’aziun sciöche n ativité de sensibilisaziun importanta por slarié fora l’interes dla popolaziun sön temesc che reverda la politica y l’ativism politich.

„Before I die I’d like to…“ é n aziun che á le fin da sensibilisé la popolaziun sön domandes importantes dla vita, sciöche por ejëmpl: „Ci va pa debojëgn por vire y por ester contënc?“ I zitadins podará scrí sü pinsiers sön les tofles metüdes sö aposta por la scomenciadia y che dess invié da se tó le tëmp da ponsé do. I dejiders y pinsiers che gnará scric sö gnará spo documentá cun fotos y publicá sön la plata internet www.provinz.bz.it/politische-bildung y sön la plata facebook „politik – und jetzt?“. „Vignöna y vignun á la poscibilité da dí la süa“, á splighé la colaboradëssa dl Ofize Formaziun permanënta, Anika Michelon, che coordinëia le proiet. „I orún sensibilisé i zitadins da se dé jö cun les idees dla democrazia, dla zitadinanza ativa, di dërc dles porsones y dl’importanza dla formaziun politica“, á splighé Michelon.

La scomenciadia nasc da n’idea dl’artista americana-taiwaneja Candy Chang, che a New Orleans á depënt n parëi de na ciasa scrion cun n spray la frasa „Before i die, i want to…“. Tröpes porsones á respognü sön le medemo parëi cun sü pensiers y dejiders y chësta scomenciadia á albü n gran suzes. Plü informaziuns sön le proiet pon ciafé sön http://www.provinz.bz.it/politische-bildung/

rc

Galaria dales fotografies

Downloads