Atualità
Plü posć por le sorvisc volontar zivil, regolamënt nü por zones produtives
I posć metüs a desposiziun por la jonëza dl Südtirol danter i 18 y i 28 agn por fá n volontariat zivil provinzial é por chësc ann de 135, tl 2014 nen êl ma 82. Incö (21 de aurí) á la Junta provinziala aproé la bandida de concurs por le 2015 cun investimënc de 911mile euro. Implü á la Junta dé löm vërda por n regolamënt d’atuaziun nü por le comerz de vijinanza te zones produtives.
„Le volontariat zivil – á comenté le presidënt Kompatscher – é na gran ressursa por la sozieté südtiroleja, y al é insciö nosc dovëi da valorisé chësc sorvisc le plü che ara va. Cun le program por le 2015 ti vëgnel metü a desposiziun ala jonëza dl Südtirol de plü poscibilitésda daidé cun ativités che ne va nia ma a bëgn dla porsona instëssa, mo de döta la comunité.“
La bandida de concurs é gnüda aproada incö (21 de aurí) dala Junta provinziala y mët a desposiziun indöt 135 posć por fá volontariat tl setur dl sorvisc zivil, cun n aumënt de plü de 50 posć en confrunt al ann passé. L’investimënt dla Junta por finanzié chësc proiet é de 911.250 euro. I volontars mëss avëi n’eté danter i 18 y i 28 agn, ai ciafará na retüda de spëises de 450 euro al mëis, y por le pröm iade pon chirí fora sce an ô fá n volontariat de 8 a de 12 mëisc, cun almanco 30 ores al edema.
Presenté na domanda pó düc i ënc y les assoziaziuns che á fát domanda por l’iscriziun tl register provinzial aposta, olache al é atualmënter presëntes 41 organisaziuns. Les domandes pó gní dades jö cina ai 26 de jügn pro l’Ofize Chestiuns de gabinet dla Provinzia (plaza Magnago 1, Balsan) te na forma digitala cun na misciun de posta eletronica zertificada a kabinett.gabinetto@pec.prov.bz o tres fax al numer 0471 412139.
Do che al é jü en forza d’otober la lege sön le comerz de vijinanza nöia á la Junta provinziala ince dé löm vërda incö (21/04) al regolamënt d’atuaziun por le comerz de vijinanza te zones produtives. „L’obietif é chël da orëi garantí le comerz de vijinanza tles zones d’abitaziun y nia te chëres produtives. La strotöra comerziala ti zëntri di paisc y dles fraziuns é la basa por avëi inant n svilup costant y por garantí n alta cualité de vita ince ti paisc dalunc dai zëntri“, á splighé le presidënt dla Provinzia Arno Kompatscher tratan la conferënza stampa.
Tl otober dl 2014 á le Consëi provinzial aprové na mudaziun dla lege provinziala tla materia dl’urbanistica che reverda le comerz te zones produtives. La regolamentaziun nöia prevëiga la poscibilité de n comerz de vijinanza te zones produtives, te na manira limitada y ma sce chësta mosöra é ince aprovada dal Comun interessé. Cina l’altonn dl 2014 ê le comerz de vijinanza nia conzedü tles zones produtives y ma consintí te caji straordinars. Cun la mudaziun dla lege vëgnel indere conzedü le comerz de vijinanza, mo al é limité a caji definis avisa cun na regolamentaziun dër rigorosa.
Sciöche Kompatscher sotlignëia ne presentëia la normativa provinziala nöia cun le regolamënt ajorné nia na soluziun definitiva por jí inant sön la strada dl model südtirolej dl comerz de vijinanza. „Les desposiziuns nöies che reverda les zones produzives é gnüdes contestades dan dala Curt costituzionala, i ciarun sëgn da ciafé na soluziun politica cun le govern. Nosta intenziun é chëra de istituí na norma d’atuaziun dl Statut d’autonomia che pois garantí segurëza y proteziun iuridica de dorada lungia“, á stlüt jö Kompatscher.
rc
