Atualità
20 agn sorvisc d’informaziun sön le stöp de flu: Les alergies é en aumënt
15 porcënt di zitadins dl Südtirol á n’alergia, cun les perzentuales che é tresfora en aumënt. „Le sorvisc d’informaziun sön le stöp de flu dl’Agenzia por l’ambiënt laora bele da plü co vint agn y s’á svilupé cun le tëmp te n stromënt d’informaziun dër d’ütl por i zitadins“, insciö l’assessur Theiner incö (24/04) pro la conferënza stampa de presentaziun dl stüde sön le stöp de flu a Leifers.
Do la contlujiun de n stüde sön la stöp de flu tl 1994 á le laboratore biologich dl APPA metü man cun so sorvisc d’informaziun tl ann 1995. „Te chisc vint agn – á sotligné te na conferënza stampa incö (24/04) l’assessur por l’ambiënt Richard Theiner y le diretur dl’Appa Flavio Ruffini – é sté le compit prinzipal dl laboratore biologich chël da garantí n’informaziun abonora y ampla por che i zitadins che á alergies pois mioré süa cualité de vita y por smendrí insciö ince les spëises por le sistem sanitar dl Südtirol.“ Le sorvisc d’informaziun sön le stöp da flu é presënt da vint agn sön internet tres la misciun www.provincia.bz.it/pollini, y da plü co 10 agn vëgnel mené fora na newsletter edemala a plü co 3mile porsones cun les informaziuns plü importantes sön le stöp de flu.
Les relevaziuns vëgn fates tres n standard europeich cun trëi staziuns de analisa a Balsan, Schlanders y Bornech. „Les proes dl stöp da flu che vëgn ciafé tl’aria vëgn coiüdes adöm, cumpedades y portades te laboratore. L’analsia é lungia y se damana tröp tëmp, mo ma insciö él poscibl da ti pité ai zitadins n’informaziun prezisa y a puntin“, á splighé Edith Bucher dl Laboratore biologich. Le florí di lëgns y dles plantes pó se sposté de plü edemes y mët man canche les temperatöres á arjunt n cër livel y porchël él important da monitoré le svilup tresfora.
Tl Südtirol él zirca le 15 porcënt dles porsones che á n’alergia da stöp de flu, na maratia che, sce ara ne vëgn nia curada tla dërta manira, po porté a astma dles bronchies y che pó porté a de gragn dans por la sanité dles porsones. „Düc chi che sá de avëi le stöp da flu dess porvé da evité le plü che ara va le contat por smendrí la perioda de soferënza“, á ajunté Alberta Stenico, la direturia dl Laboratore biologich. Por ci che reverda la situaziun atuala á le tëmp cialt y da vënt di ultims dis amplié le stöp da flu, te na manira particolara de danter l’ater bedoi, rou y frassen. Por plü informaziuns: www.provincia.bz.it/pollini.
rc
