Atualità
Campagna cuntra i inzidënc cui motors „No Credit“: placac sön 80 corieres
Sön 80 corieres che vëgn adorades tl trasport publich local él gnü taché sö sön la pert iadedô n placat cun le motif nü dla campagna de sensibilisaziun cuntra i inzidënc di motors sön strada „No Credit“. Chësta é öna dles mosöres preodüdes tl 2015 por sensibilisé i zitadins da rovëne te na manira sigüda y responsabla.
„Cun les aziuns de sensibilisaziun tl contest de No Credit orunse ti recordé a düc i autisć la responsabilité sön strada, nia ma ti confrunc de se instësc, mo ince ti confrunc di atri“, á splighé l’assessur por la mobilité y le sorvisc strades Florian Mussner. Cun la campagna de No Credit, che é n pilaster de sensibilisaziun costant dla Provinzia dal 2006 inant, él gnü mosoré n smendrimënt di inzidënc cui motors, porchël che ince chësc ann sarál 80 corieres dl trasport publich che portará placac cun la scrita „No Credit“ y che mostra n indicadú de velozité cun sön la man dërta mersces de sanch che segnalëia les conseguënzes de na velozité massa alta.
Dlungia le simbol grafich nü, che sará da odëi sön les corieres, sön i placac dlungia strada, pro les architades dles corieres y sön i flyers á la campagna ciamó trëi d’atri pilastri fondamentai. Por aumenté la segurëza di motoziclisć él insciö preodü, sciöche ince ti agn passá, n’ajornamënt costant dla segnaletica y dl’ilumiaziun dles strades, n ressanamënt de strades cun l’asfalt danejé y l’istalaziun de 2630 metri de tlandri dla strada nüs cun na proteziun aposta por i motoziclisć sön 63 trates dër prigoroses. Implü gnarál controlé dala polizia comunala y stradala diretamënter sön les strades. Le compit primar de chëstes aziuns dess ester la sensibilisaziun y informaziun di motoziclisć, mo sce al vëgn costaté n comportamënt nia coret, ince l’esecuziun de multes. Ince chësc ann gnarál efetué controi dala polizia comunala y stradala tratan i fins dl’edema y dis de festa cun na presënza dër alta de motoziclisć sön i jus y tles trates adorades de plü dai motoziclisć dla Talia y da foradecá. Inant jará ince la colaboraziun cun le Safety Park, olache al é gnü realisé n flyer cun informaziuns ütles y cun chël che i motoziclisć ciafará ince na diminuziun di cosć por cursc de segurëza y d’ajornamënt al Safety Park.
rc
