Atualità
Daurida dl Museum Ladin a San Martin y a San Ciascian al 1 de má
Le Museum ladin Ciastel de Tor de San Martin de Badia y le Museum Ladin Ursus Ladinicus a San Ciascian dauriará indô sües portes por vijites da en vëndres, al 1 de má dl 2015 cina la fin d'otober.
Trami dui i museums podará gní vijitá döt l’isté cina ai 31 de otober dl 2015, dal mertesc ala sabeda, dales 10 ales 17 (de lugio y d’agost cina les 18.00, ince le lönesc) y la domënia dales 14 ales 18. La cherta por vijité un n museum pó ince gní anuzada por vijité l’ater debann.
Le Museum Ladin „Ciastel de Tor“ presentëia na panoramica di Ladins dles Dolomites, plü de 30.000 porsones, che á n'identité caraterisada da dui elemënc de gran importanza: so lingaz particolar, che va zoruch al latin vulgar, y laprò la contrada da munt dër singolara, amesa les Alpes dl süd. Da passé tres le Museum Ladin pòn incuntè n valgönes zircostanzes particolares fòra dla storia y dl tëmp da sëgn di Ladins dles Dolomites; al vëgn fat löm söi influsc dezisifs che i avenimënc suraregionai à albü tla vita de chësta popolaziun y nosc edl vëgn condüt söla corelaziun danter formes de contrada y manieres de vire.
Le Museum Ladin „Ursus ladinicus“ é gnü daurí tl 2011 a San Ciascian tla Val Badia y é dediché ala laurs dl ander y ala geologia dles Dolomites. L'esposiziun, metüda fora sön trёi alzades, nes lascia odёi la storia y l'ambiёnt dla laurs di andri, che viô dan da 40.000 agn. Al vёgn mostrè osc originai, dёnz y crёpes de na sort de laurs nöia, a chёra che al ti é gnü dè le inom de Ursus ladinicus. Implü pon odёi instalaziuns video, n schelet de laûrs di andri y na reproduziun de n "Ursus ladinicus che dorm". Na seziun a pert é dedicada ala nasciüda dles Dolomites, cun tröc corёc che nes mostra les tapes plü importantes.
Plü informaziuns: Museum Ladin Ćiastel de Tor, via Tor 65, San Martin de Tor, tel. 0474 524020, http://www.museumladin.it/
rc
