Atualità
Ferates regionales: motor por la mobilité, l'economia y le turism
Dales ferates locales ales ferates a d’alta velozité, dal tunel de basa ales staziuns plü piceres: la Provinzia laora tresfora por renforzé les ferates regionales che vëgn conscidrades sciöche le motor prinzipal dl’economia y dl turism. Chësc é sté un di conzec prinzipai al convëgn da incö (04 de má) en gaujiun di 10 agn dla linia dla Val Venosta.
„I sun arjigná ca por surantó competënzes nöies che reverda la mobilité sön les scines – á sotligné le presidënt dla Provinzia Arno Kompatscher – cun l’obietif da mioré, en colaboraziun cun les istituziuns statales competëntes y cun l’aziënda de gestiun dles ferates talianes, le sorvisc publich local sön les scines.“ Tratan le convëgn en gaujiun di 10 agn dla linia dla ferata dla Val Venosta, che é gnü organisé incö (lönesc ai 04 de má) dala STA, dala SAD y dal Departimënt provinzial por la mobilité, á le presidënt Kompatscher, adöm al assessur competënt Florian Mussner, sotligné l’importanza fondamentala dla mobilité sciöche idea moderna de comunicaziun che coliëia strades, scines y l’aria, „cun l’obietif da mioré l’azes a nosc raiun alpin.“
Chësc conzet é ince gnü sostigní da Paolo Emilio Signorini, suranstant dl Departimënt dl Minister dles infrastrotöres, y dala professuria universitara Gabi Tröger Weiss. Trami dui á recordé l’importanza „dl’ultima milia, la plü gran sfidada dl dagní.“ Do l’opiniun de Signorini, „dess les regiuns alpines avëi na sensibilité particolara por ci che reverda la mobilité sostenibla. La re-ativaziun dla linia dla Val Venosta y la modernisaziun dla linia dla Val de Puster é dui ejëmpli da copié.“ Por ci che reverda la linia danter Maran y Malles, che á complí incö 10 agn, vëgnel registré 2 miliuns de anuzadus al’ann, n numer che desmostra la gran valüta di investimënc fac.
„Mo le percurs de suzés dla linia dla Val Venosta ne é nia rové – á ajunté le diretur dla STA Joachim Dejaco – la capazité dla linia é rovada oramai al limit, l’eletrificaziun sará la plü gran sfidada ti proscims agn. Les operes por fá pié ia le proiet é a n bun punt, y i laurs podess gní stlüc jö te 3-4 agn cun n investimënt de indöt 55 miliuns de euro.“ Al convëgn ál ince tut pert incö le suranstant dla RFI Maurizio Gentili (comunicat stampa a pert sön n’acordanza de mascima danter la Provinzia y RFI), l’espert dl setur feroviar Gunter Mackinger y le diretur dla Repartiziun Mobilité Günther Burger.
rc
