Atualità
Vire i parcs naturai d’isté: Codejel d’informaziun nü
Na seria de manifestaziuns, escursciuns, conferënzes y mostres por mitans y mituns: l’oferta di set parcs naturai dl Südtirol é dër ampla y interessanta ti mëisc da d’isté . Dötes les scomenciadies é gnüdes racoiüdes te n codejel nü dé fora dal Ofize parcs naturai, desponibl da sëgn inant.
„Ince chësc ann mët i set parcs naturai dl Süditirol a desposiziun por düc i vijitadus, sides dla jënt dl post co di ghesć da foradecá, n program dër ampl cun tröpes manifestaziuns y scomenciadies“, sotlignëia l’assessur provinzial por l’ambiënt Richard Theiner, che inviëia düc a anuzé dles tröpes ocajiuns por conësce plü daimpró le paesaje de morvëia dla natöra ti parcs naturai dl Südtirol. „Danter i fins prinzipai di parcs naturai ne él nia ma la sconanza dl paesaje y l’archirida scientifica, mo ince le relax tla natöra y l’educaziun ambientala“, ajuntëia Enrico Brutti, diretur dl Ofize provinzial Parcs naturai. Por l’isté vëgnel insciö metü da jí de plü escursciuns sciöche por ejëmpl sön le tru geologich tl parch natural Scilier-Ćiadinac, un di plü interessanc dl’area dles Dolomites.
Te dötes les ciases di Parcs naturai él implü preodü de plü mostres interessantes sciöche chëra di gragn predadus (laurs, lustrí, lus) tl zënter dles vijites dl Grup de Tessa a Naturns o l’esposiziun de corëc y dinosaurs tles Dolomites tl zënter dles vijites dl parch Fanes-Senes-Braies a Al Plan de Mareo. Tl program él ince da ciafé escursciuns pro inrescí la geologia dles Dolomites, patrimone natural dl UNESCO en colaboraziun cun le Museum Ladin „Ciastel de Tor“, conferënzes y proieziuns de films, danter l'ater ne sëra ai 13 d’agost tl parch natural Trëi Pizes de Lorëi cun la paleontologa Evelyn Kustatscher che baiará dles Dolomites. Dötes les ofertes che vëgn pitades é gnüdes coiüdes adöm tl codejel „Vire i parcs naturai d’isté 2015“ (, "Vivere i parchi naturali estate 2015") da ciafé te dötes les Ciases di Parcs naturai, ti ofizi dl tursim di Comuns tl’area di parcs naturai y tl Ofize provinzial Parcs naturai a Balsan (via Renon 4)
Le codejel po ince gní desciarié tlican sön le link www.provincia.bz.it/natura-territorio/temi/2389.asp.
rc
