Atualità
Döes ciampanes nöies por Ćiastel Tirol
Inier él gnü benedí (12 de má) döes ciampanes nöies dla capela de Ćiastel Tirol che é dedicades ai Sanc Pancrazio y Elisabeth. Ala zerimonia de benedisciun al tut pert danter l’ater l’assessur Florian Mussner y le diretur dl Museum de Ćiastel Tirol, Leo Andergassen.
Al ê da plü de n secul, plü avisa dal ann 1917, che la capela de Ćiastel Tirol ê zënza ciampanes che ê gnüdes tutes jö dai soldas dl Impêr austroungarich por che le metal podess gní adoré tratan la Pröma Vera Mondiala. La capela de Ćiastel Tirol é dedicada ai dui Sanc Pancrazio y Elisabeth y porchël él gnü benedí inier (mertesc ai 12 de má), patrozine de San Pancrazio, les döes ciampanes nöies. Le scoltur Ulrich Egger á abelí les döes operes d'ert cun rapresentaziuns de ert contemporanea di dui Sanc proteturs.
La festa de benedisciun é gnüda zelebrada dal abat dl Convënt de Stams, German Erd, dal caplan de Ciastel Tirol, Edmund Ungerer, en presënza dl assessur provinizial Florian Mussner y dl diretur dl Ćiastel Tirol Leo Andergassen.
Les döes ciampanes á n pëis complessif de 190 chili y é gnüdes delegades dala coraria spezialisada Grassmayr de Desproch.
rc
